Ndëshkimi i Vladimir Putinit dhe Rusisë për agresionin kundër Ukrainës duket se do të na kushtojë edhe neve në shtëpitë tona. Sepse për të goditur Rusinë aty ku i dhemb vërtet, do të duhej t’i lëndonim të gjithë.
Rusia është prodhuesi kryesor i naftës dhe gazit natyror, por bota është e varur nga eksportet e saj. Është fakst se Bashkimi Evropian varet nga Rusia për më shumë se 1/3 e gazit të saj natyror.
Kjo është arsyeja pse lëvizja e Gjermanisë për të anuluar certifikimin e gazsjellësit Nord Stream 2 që do të dërgonte gaz natyror rus në Gjermani është kaq dramatike.
Ish-presidenti i Rusisë dukej se gëzohej për varësinë e BE-së duke shkruar në Twitter: “Mirë se erdhët në botën e re të guximshme ku evropianët shumë shpejt do të paguajnë 2 000 euro për 1000 metra kub gaz natyror!”
Mënyra më efektive për të goditur Rusinë me sanksione është ndërprerja e furnizimit të saj me naftë dhe gaz natyror për Perëndimin. Por kjo mund të shkaktojë çmime edhe më të larta dhe më shumë dhimbje për konsumatorët.
Çmimet e naftës tashmë janë afër niveleve të larta të 8 viteve dhe shërbejnë si një nxitës kryesor i inflacionit. Kjo ka edhe një kosto politike dhe këto vendime do të jenë të vështira për t’u miratuar nga liderët e Perëndimit.
“Presidenti i Shteteve të Bashkuara duhet të shqetësohet për vendimet që po merr për shkak të zgjedhjeve që po vijnë dhe po ashtu liderët në Evropë gjithashtu kanë kufizimet e tyre politike të brendshme,” – më tha analisti politik i CNN, Josh Rogin.
“Kjo bëhet duke kufizuar gamën e përgjigjeve, gamën e veprimit që aleatët mund të ndërmarrin si përgjigje ndaj agresionit të Putinit. Sigurisht që Putin e di këtë. Ky është një realitet i demokracive dhe është një avantazh për Putinin që ai me siguri do ta shfrytëzojë” – shtoi ai.
Shtëpia e Bardhë dhe aleatët kanë njoftuar raundin e tyre të parë të sanksioneve – mbi dy banka, borxhin sovran dhe disa oligarkë rusë – dhe disa sanksione që priten nëse Putin do të vazhdojë në rrugën e tij. Edhe vetë Biden pranoi se sanksionet do të dëmtonin edhe amerikanët.
“Mbrojtja e lirisë do të ketë kosto edhe për ne këtu në shtëpi,” – tha Presidenti Biden të martën duke shtuar: “Ne duhet të jemi të sinqertë për këtë.”
Ai i quajti “kritike” kostot më të larta të energjisë.
“Ne po monitorojmë nga afër furnizimet me energji për çdo ndërprerje dhe po zbatojmë një plan në koordinim me konsumatorët dhe prodhuesit kryesorë të naftës në drejtim të një investimi kolektiv për të siguruar stabilitetin dhe furnizimet globale të energjisë,” – tha Biden.
Çfarë mund të thotë kjo? Presion mbi prodhuesit për të investuar në energji, lëshime të koordinuara të rezervave strategjike të naftës me aleatët, një lehtësim tatimor për gazin ose stimuj për prodhuesit vendas.
Por mjetet e presidentit Biden janë të kufizuara.
“Ne kemi leva, Putini ka leva dhe kur të gjithë të mbarojmë duke tërhequr të gjitha levat tona, ne do dalim zbuluar. Aftësia e rusëve për të manipuluar tregjet e energjisë do të jetë gjithmonë më e madhe se aftësia e evropianëve për të zbutur këto manipulime” – tha Rogin.
