Korrespondenti i BBC, Pol Adams shkruan se ushtarakët rusë kanë ndryshuar taktikën fillestare për pushtimin e Ukrainës. Ai vë në dukje se tashmë ushtria ruse po synon të vërë në kontroll qytetet e mëdha, për të arritur më pas në Kiev. Ndërkohë më parë, misioni i vetëm ishte thjesht kontrolli i kryeqytetit dhe rrëzimi i qeverisë. Më poshtë analiza e publikuar në BBC.
Nga Pol Adams
Shqetësimi më i madh i qeverisë së Ukrainës këtë mëngjes është se trupat ruse janë tani brenda qytetit të dytë më të madh të vendit, Kharkiv.
I pozicionuar kaq afër kufirit me Rusinë, ai gjithmonë kishte gjasa të ishte një nga qytetet e para të mëdha që do të ishte në rrezik. Kjo duket të jetë lufta e parë e vërtetë në rrugë deri tani.
Disa nga imazhet që dalin nga qyteti tregojnë trupat ukrainase duke gjuajtur granata me raketa në cepat e rrugëve dhe trupat ruse, në këmbë, duke lëvizur pas automjeteve të blinduara.
Lufta urbane është e çrregullt dhe e paparashikueshme. Ky do të jetë një test si për mbrojtësit ashtu edhe për sulmuesit.
Strategjia e Rusisë deri më tani duket se ka qenë të anashkalojë qytetet e mëdha, kështu që ky është një ndryshim taktike, që tregon jo vetëm dëshirën për të kontrolluar kryeqytetin Kiev dhe për të zëvendësuar qeverinë, por edhe për të mbajtur qendrat kryesore të popullsisë.
Ose, të paktën, për të neutralizuar qytetet nga të cilat mund të organizohet rezistencë efektive kundër linjave të furnizimit të Rusisë që zgjerohen gradualisht.
Producentja e BBC-së, Kathy Long tha se e diela zbardhi e ftohtë dhe e qetë në Kiev, me policinë, ushtrinë dhe vullnetarët e armatosur të vetmit njerëz të dukshëm në rrugë.
Flamuri kombëtar blu dhe i verdhë ende valëvitet në shumë prej ndërtesave të zbukuruara që vizatojnë horizontin e Kievit, ndërsa vendi hyn në ditën e tij të katërt nën pushtimin rus.
Ndërkohë në qytetin verilindor të Okhtyrka, kryetari i bashkisë tha se të paktën gjashtë ukrainas – përfshirë një vajzë shtatëvjeçare – kishin vdekur si rezultat i një sulmi rus të premten.
Një kopsht fëmijësh dhe një jetimore ishin ndër ndërtesat që thuhet se u goditën, të cilën Rusia e ka mohuar.
Ministri i Jashtëm i Ukrainës Dimitri Kuleba ka akuzuar për krime lufte dhe ka bërë thirrje për një hetim nga Gjykata Penale Ndërkombëtare./Përshtati Lapsi.al
