Anija e komandës dhe kontrollit të klasit Blue Ridge, USS Mount Whitney, mbërrin në Durrës më 6 shtator për një vizitë të planifikuar në portin MBM, duke nënvizuar partneritetin e fortë dhe të qëndrueshëm midis Shteteve të Bashkuara dhe Shqipërisë dhe angazhimin e të dy vendeve për sigurinë rajonale.
Gjatë vizitës së Mount Whitney, anija do të organizojë një pritje për vizitorë të shquar, përfshirë të Ngarkuarën me Punë në Ambasadën e Shteteve të Bashkuara në Tiranë, Nensi Van Horn, Presidentin dhe Ministrin e Mbrojtjes së Shqipërisë, Shefin e Shtabit te FA dhe Komandantin e Forcës Detare të Shqipërisë, si dhe aktivitete të tjera, raporton korrespondentja e Top Channel, Vali Qyrfyçi.
Kjo vizitë, që është e para e një anijeje ushtarake të flotës Amerikane që bregëzohet në një port në Shqipëri me përmasa dhe kapacitete të tilla (195x34x9.5m), është një mundësi e rëndësishme për kapacitetet e Porto Romanos si port strategjik në Shqipëri si dhe për të rritur bashkëpunimin për sigurinë detare në detin Mesdhe.
Si anije komanduese dhe kontrolluese e Flotës së 6-të të SHBA-së, Mount Whitney mbështet luftën në det për të penguar kundërshtarët rajonalë, për të kryer operacione detare në interes të SHBA-së dhe për të mbrojtur sovranitetin e partnerëve dhe aleatëve në Evropë dhe Afrikë.
Komanda e Flotës së 6-të të SHBA-së, me seli në Napoli, Itali, kryen spektrin e plotë të operacioneve të përbashkëta, ajrore dhe detare, shpesh në bashkëpunim me aleatë dhe agjencitë partnere për të çuar përpara interesat kombëtare të SHBA-së, sigurinë dhe stabilitetin në Evropë dhe Afrikë.
