Komandanti i Forcës Detare shqiptare, gjeneral brigade, Ilir Xhebexhia, vizitoi dje anijen USNS Trenton të Marinës Amerikane, gjatë ndalesës së saj për furnizim në Durrës.
Komandanti shqiptar u prit nga kapiteni i Shteteve të Bashkuara, Douglas Casavant dhe Komandanti TJ Seifert, të cilët e shoqëruan për një vizitë brenda anijes, njoftoi sot ambasada e SHBA në Tiranë.
Kapiteni Casavant shprehu kënaqësi të mirëpriste komandantin e Forcës Detare shqiptare për të thelluar angazhimin dhe bashkëpunimin midis dy vendeve. “Ne mirëpresim ndërveprime të tjera të përbashkëta në të ardhmen pas suksesit të stërvitjes Defender – Europe 21”, u shpreh ai.
Kjo anije përdoret nga Marina Amerikane për transport pajisjesh dhe është e pajisur edhe me një pistë për uljen e helikopterëve.
Ekuipazhi zhvilloi një vizitë të këndshme në Durrës dhe patën mundësinë të mësonin mbi historinë e Shqipërisë.
“Mikpritja e Forcave Detare Shqiptare ka lënë përshtypje të thellë tek marinarët tanë dhe ne shpresojmë ta përdorim këtë vizitë si një mundësi për të vazhduar forcimin e marrëdhënies sonë me Forcat e Armatosura Shqiptare”, tha komandanti Seifert./ATSH/
