Përfundimi i procesit zgjedhor dhe certifikimi i rezultateve të zgjedhjeve nuk pritet të ndodhë para datës 18 mars. Përfundimi i numërimit i ka lënë hapësirë ankesave të mundshme para shpalljes së rezultatit. Prokuroria Themelore e Mitrovicës urdhëroi rinumërimin e votave të Lidhjes Demokratike të Kosovës në Vushtrri, pas ankesave të kandidates për deputete Rrezarta Krasniqi se bashkëpartiaku i saj, Xhafer Tahiri, ka manipuluar me vota.
Krasniqi pretendon se në një vendvotim, Tahiri kishte marrë më shumë vota se edhe vetë Lumir Abdixhiku, kryetar i LDK-së. Rinumërimi që nisi të enjten zgjati edhe gjatë ditës se premte, ndërsa aty nuk u lejua prania e mediave, për shkak të hetimeve dhe prezencës së zyrtarëve të Prokurorisë.
“Prokuroria Themelore në Mitrovicë ka dhënë urdhër që të rinumërohen të gjitha votat nga qendrat e vendvotimeve në komunën e Vushtrrisë t ënjë subjekti politik. Ky rinumërim vjen pas aneksave të një kandidateje për deputetë të këtij subjekti përktizai me dyshimet për manipulim me vota breda subjektit të cilit i takon ankuesja. Pas rinumërimit të vendvotimeve, varësisht nga gjetjet do të procedohet më tutje”, thotë Prokuroria.
Edhe Lëvizja Vetëvendosje i kërkon prokurorisë që të hetojë votat e ardhura me postë për pretendime me manipulim nga Lidhja Demokratike e Kosovës, mirëpo nga prokuroria nuk kanë konfirmuar nëse kanë nisur hetimet.
“Fenomeni i vjedhjes së votave në përgjithësi ëhstë një praktikë shqetësuese që dëmton padyshim intgeritetin e proceseve zgjedhore dhe gjithashtu e zbeh besimin e bindjen e qytetarëve në institucionet demorkatike e insttucionale”, shprehet Melos Kolshi nga IKD për A2.
Edhe fakti që Komisioni Qendror i Zgjedhjeve nuk nisi numërimin me kohë bën që të ketë më shumë ankesa. Të gjitha këto afate kërkojnë kohën e tyre dhe kjo ndikon në vonesën e formimit të institucioneve të reja për faktin se afatet e përcaktuara me Kushtetutë dhe aktgjykime të Gjykatës Kushtetuese fillojnë të rrjedhin nga certifikimi i rezultateve zgjedhore.
“Përveç vonesës në shpalljen e rezultateve edhe numërimi i votave të kandidatëve është nisur me vonesë, ky proces nuk është zhvilluar njëkohësisht në të gjitha komunat çka mund të krijojë një hapësirë për kërkesa nga partitë politike për rinumërim të votave përmes ankesave dhe eventualisht kontestim të rezultateve nga subjektet politike gjithashtu nga kandidatët për deputetë”, thekson Kolshi.
Sa i përket veprave penale që lidhen me manipulime eventuale të votave, Kodi Penal i Republikës së Kosovës parasheh gjoba deri në dënim me burg deri në 5 vjet heqje lirie.
