Ligjet i bëjmë si europianë por i zbatojmë si shqiptarë! Shqetësimin se jo gjithçka zbatohet ashtu siç thuhet e ngriti Dhoma Amerikane e Tregtisë në një takim me Drejtorinë e Përgjithshme të Tatimeve. Një shembull konkret e solli kryetarja e Komitetit të Tatimeve dhe Doganave në Dhomën Amerikane.
“Rimbursimi i TVSH për rastet e investimeve, tatimet gjejnë artifica për të mos kredituar TVSH për bizneset që po bëjnë një investim. Kjo është një barrë e rënda për investimet. Rasti i dytë, është ai i shitjeve nën kosto, është praktikë, dhe ligji Praktika e tatimeve është në kundërshtim.
Në fund janë penalizuar subjektet që operojnë në fushën e energjisë elektrike, për shkak të ndryshimit të çmimit të energjisë janë penalizuar dhe detyruar të paguajnë tatime të mëdha pasi nuk e kanë shitur energjinë me çmimin e blerjes”, tha Alketa Uruçi, Komiteti i Tatimeve dhe Doganave, AMCHAM.
Teksa argumentoi se në drejtim të praktikave të Rimbursimit të Tatimit mbi Vlerën e Shtuar janë bërë shumë hapa para, Drejtori i Përgjithshëm i Tatimeve Ilir Binaj kërkoi detaje më shumë detaje mbi rastet e refuzimeve.
“Edhe pse ndonjëherë roli i Dhomës së Tregtisë dhe anëtarëve të saj mund të duket i ndryshëm nga yni — ne kemi fokus mbledhjen e të ardhurave dhe përmbushjen, ju keni fokus rritjen e biznesit dhe krijimin e mundësive — besoj se objektivi ynë përfundimtar është i njëjtë: një ekonomi e fortë dhe e begatë. Në shumë raste, marrëdhënia mes administratës tatimore dhe bizneseve mund të jetë përballje dhe e vështirë, ndaj ne jemi këtu për të ndërtuar ura mes nesh”, tha Ilir Binaj, Drejtor i Përgjithshëm i DPT-së.
Me kërkesë të drejtorit Ekzekutiv të Dhomës Amerikane të Tregtisë, kreu i tatimeve tregoi edhe mbi mënyrën se so do të batohet paqja fiskale me biznesin nga 1 janari 2026.
“Në të kaluarën ka pasur ankesa nga bizneset për frekuencën e kontrolleve tatimore, por nga ana tjetër, administrata tatimore ka detyrimin të mbledhë të ardhurat, dhe duke marrë parasysh nivelin e informalitetit, kjo nuk mund të bëhet pa masa të detyruara. Kështu, paqja fiskale është pika e mesit: administrata tatimore bie dakord të mos kryejë kontrolle për tatimin mbi të ardhurat, me premtimin e pagesave më të larta”.
Nga takimi me anëtarët e Dhomës Amerikane të Tregtisë, Drejtori i Përgjithshëm i Tatimeve Ilir Binaj njoftoi se nga janari i vitit të ardhshëm do të ushtrohen kontrolle në sektorin e identifikimit me qëllim parandalimin e rasteve të informalitetit në paga.
