Janë anuluar të gjitha garat e mëdha të xhudos të planifikuara të mbahen deri në fund të prillit.
Vendimin e mori të hënën mbrëma Komiteti Ekzekutiv i Federatës Ndërkombëtare të Xhudos për shkak të përhapjes së madhe të koronavirusit. Vendimi ka hyrë në fuqi menjëherë, ndërsa janë anuluar turneu Grand Slam në Ekaterinburg të Rusisë, si dhe turnetë Grand Prix në Tbilisi të Gjeorgjisë dhe Antalya të Turqisë. Janë anuluar edhe ngjarje tjera kontinentale.
“Për fat të keq situata tani është e rrezikshme dhe kritike. Është e rëndësisë së jashtëzakonshme të mbajmë familjen e xhudos të sigurt në këto kohë të vështirë dhe po ashtu të ofrojmë mundësi të barabarta për të gjithë xhudistët që të sigurojnë normën olimpike”, thuhet në njoftimin e IJF-së.
Vendimi i IJF-së prek edhe sportistët më të mirë të Kosovës, përkatësisht xhudistët e trajnerit Driton Kuka. Majlinda Kelmendi e Loriana Kuka është pritur që në fund të javës të garojnë në turneun Grand Slam në Ekaterinburg të Rusisë. Për to është dashur të jetë gara e parë e vitit.
Në fillim të majit duhet të mbahet Evropiani për seniorë. Në Evropianin në Pragë, Kosova synon disa medalje.