Gjiganti i pajisjeve teknologjike “Apple” ka bërë të ditur se të ardhurat e kompanisë pritet të jenë më të ulëta nga parashikimet në tre muajt e parë të vitit 2020, për shkak të shpërthimit të koronavirusit të ri në Kinë.
Kompania njoftoi se pas epidemisë, “Apple” është detyruar të mbyllë fabrikat dhe disa dyqane në Kinë, goditur nga virusi, situatë e cila përkohësisht do të kufizojë furnizimin global të telefonave “iPhone”.
“Apple” regjistroi 91,8 miliardë dollarë të ardhura në periudhën tetor-dhjetor ndërsa për tre muajt e parë të vitit 2020 parashikoi të ardhura prej 63-67 miliardë dollarë.
“Puna ka nisur në të gjithë vendin, por ne po përjetojmë një kthim të ngadalshëm në kushte normale nga ajo që kishim parashikuar”, theksoi “Apple”.
Përveç furnizimit global të kufizuar, shitjet e telefonave “iPhone” po ashtu u prekën nga koronavirusi i ri, pasi kërkesa për pajisje “Apple” shënoi ulje në Kinë.
Koronavirusi i ri, tashmë zyrtarisht i njohur si COVID-19, për herë të parë u shfaq në muajin dhjetor në qytetin kinez Wuhan të provincës Huberi.
Deri më tani, ky virus ka shkaktuar mbi 1800 të vdekur dhe rreth 72 mijë raste të tjera të konfirmuara./ATSH/
