Një stuhi e fortë po trondit futbollin argjentinas dhe rrezikon pasoja të rënda në arenën ndërkombëtare. Presidenti i Federatës Argjentinase të Futbollit, Claudio “Chiqui” Tapia, ndodhet në qendër të një hetimi të thelluar gjyqësor, i cili mund të çojë deri te përjashtimi i Argjentinës nga Botërori 2026 dhe vënia në pikëpyetje e zhvillimit të “Finalissima”-s.
Gjykatësi federal, Daniel Rafecas, ka urdhëruar kontrolle të reja në një rezidencë luksoze në zonën e Pilarit, pronë e regjistruar në emër të kompanisë “Real Central SRL”. Sipas hetimeve, kjo shoqëri dyshohet se lidhet indirekt me Tapian përmes Luciano Pantano-s dhe Ana Lucía Conte-s, të cilët autoritetet i konsiderojnë si figura të ndërmjetme të presidentit të AFA-s. Të dy janë aktualisht nën ndalim daljeje nga vendi.
Ky operacion i fundit vjen pas një serie kontrollesh të mëparshme në mbi 15 klube futbolli dhe në një zyrë në qendër të Buenos Airesit. Në fokus është rritja e dyshimtë e pasurisë së Tapias dhe rrethit të tij të ngushtë. Nën hetim është edhe arkëtari i AFA-s, Pablo Toviggino, si dhe kompania financiare “Sur Finanzas”, e akuzuar për praktika abuzive në dhënien e kredive për klubet.
Çështja tashmë ka marrë përmasa ndërkombëtare. FIFA po monitoron nga afër zhvillimet, e shqetësuar për çdo formë ndërhyrjeje politike në federatë, skenar që mund ta përjashtonte Argjentinën nga Kupa e Botës 2026.
Në këtë klimë pasigurie, edhe kombëtarja kampione e botës po vepron me kujdes. Trajneri Lionel Scaloni po rishikon mundësinë e zhvillimit të “Finalissima”-s ndaj Spanjës në mars, duke reflektuar pasigurinë që sot mbizotëron rreth AFA-s. Situata po cenon jo vetëm reputacionin institucional, por edhe axhendën sportive të futbollit argjentinas.
Marrë nga La Nacion
