Lufta tarifore e filluar nga Donald Trump jo vetëm ka tronditur tregjet ndërkombëtare, por ka nxjerrë në pah një fenomen i cili nuk është parë që nga vitet 1970. Për herë të parë ari ka marrë revansh kundrejt kartëmonedhës dhe veçanërisht dollarit dhe euros. Sipas përllogaritjeve të fundit, rezulton se çmimi i arit është rritur në nivel rekord në 24 orët e fundit. Çmimi i një rreth 31.1 gram u ngjit në pothuajse 3,176 dollarë në SHBA, duke zgjatur fitimet e një dite më parë.
Për shkak të luftës tarifore të nxitur nga presidenti i SHBA-së, Donald Trump, më shumë investitorë po vënë baste për arin. Rritja e metalit të çmuar po nxitet nga rënia e shpejtë e vlerës së monedhës amerikane, thonë ekspertët e tregjeve ndërkombëtare. Kjo gjithashtu është pasojë e shitjes së aksioneve dhe obligacioneve amerikane.
Sakaq një tjetër fenomen është vënë re. Vendet tradicionalisht aleate po rishikojnë marrëdhëniet mes tyre. Vietnami aleati besnik i Kinës dëshiron të forcojë kontrollet e tij mbi eksportet e ndjeshme në Kinë dhe të kufizojë tregtinë me vendin më të fuqishëm në Lindjen e Largët. Burime diplomatike për Reuters bëjnë me dije se, Vietnami shpreson të anashkalojë tarifat e SHBA-së. Vendimi me sa duket u nxit, ndër të tjera, nga një vizitë e Peter Navarro, këshilltar tregtar i Shtëpisë së Bardhë, i cili shprehu shqetësimin për mallrat kineze që dërgohen në Amerikë me etiketën “Made in Vietnam” për shkak të tarifave më të ulëta. Vietnami ishte subjekt i një tarife prej 46 për qind si pjesë e politikës tarifore të Donald Trump. Vendi i varur nga eksporti shpreson se tarifat do të ulen në 22 deri në 28 përqind, nëse jo më të ulëta.
Ndërkohë Bashkimi Europian po ndryshon balancat gjeoekonomike. Ajo po mendon të largohet nga partneriteti ekonomik tradicional me SHBA-në. Krerët e shteteve dhe qeverive të Bashkimit Evropian po planifikojnë një samit me presidentin kinez Xi Jinping në fund të korrikut. Sipas mediave ndërkombëtare BE-ja dhe Kina duan të bashkëpunojnë më ngushtë dhe kanë nisur negociatat për heqjen e tarifave kundërbalancuese të BE-së për importet e makinave elektrike kineze.
Një zgjidhje është planifikuar: prodhuesit kryesorë të makinave elektrike në Kinë do të investojnë më shumë në Evropë dhe do të ofrojnë transferime teknologjie. Në këmbim, BE-ja do të vendoste një çmim minimal në vend të tarifave kundërbalancuese.
