Dhëndri i ish-kryeministri Sali Berisha është lënë në burg pasi Gjykata e Posaçme i ka komunikuar atij vendimin mbrëmjen e sotme. Ndërsa bashkëpunëtorit të tij, inxhinierit dhe ndërtuesit, Fatmir Bektashi i është caktuar masa e detyrimit të paraqitjes.
Sa i përket Malltezit Gjykata konstaton se ai ka kryer veprat penale “korrupsioni pasiv i funksionarëve të lartë shtetërorë ose të zgjedhurve vendorë”, kryer në bashkëpunim, parashikuar nga neni 260 e 25 i Kodit Penal dhe “Pastrimi i produkteve të veprës penale ose veprimtarisë kriminale”, kryer në bashkëpunim, parashikuar nga neni 287 paragrafi i dytë i Kodit Penal”, thuhet në vendimin e Gjykatës së Posaçme të shkallës së parë referuar procedurës së privatizimit të ish-kompleksit të klubit sportiv “Partizani”.
Ndërkaq për bashkëpunëtorin e tij, ndërtuesin Fatmir Bektashi është caktuar masa e “detyrimit të paraqitjes” pasi akuzohet për korrupsion pasiv dhe pastrim parash.
Sipas Gjykatës, Bektashi duhet të paraqitet “të hënën e parë dhe atë të tretë të çdo muaji, ora 11:00 para oficerit të policisë gjyqësore Adelajda Metaj, pranë Prokurorisë së Posaçme kundër Korrupsionit dhe Krimit te Organizuar.”
Gjithashtu, atij i ndalohet të mos largohet nga territori i Republikës së Shqipërisë pa autorizimin e gjykatës.
Akuzat
Dhëndri i ish-kryeministrit Berisha akuzohet për korrupsion pasiv dhe pastrim parash pasi është favorizuar nga ish-kryeministri Berisha për të privatizuar ish-kompleksin e klubit sportiv “Partizani”.
Ndërkaq, ish-kryeministri akuzohet për korrupsion pasiv pasi sipas dosjes hetimore të SPAK, ish-kryeministri Berisha ka favorizuar dhëndrin e tij, Jamarbër Malltezin për të bërë të mundur privatizimin e ish-kompleksit “Partizani”.
Nga ana e tij, Berisha nuk e njeh vendimin e Gjykatës së Posaçme Kundër Krimit dhe Korrupsionit, duke e quajtur antikushtetues dhe për këtë arsye nuk u paraqit sot në gjykatë çka detyroi që oficerët e policisë gjyqësore të mbërrijnë në shtëpinë e tij pasditen e sotme për t’i komunikuar sërish masën e sigurisë “detyrim paraqitje”. Ndërsa Gjykata e Posaçme i ka bërë thirrje ish-kryeministrit Berisha që të paraqitet ditën e nesërme në orën 14:00 në dyert e kësaj gjykate për t’u njohur me masën e sigurisë së ndërmarrë ndaj tij.
Vendimi i plotë
Gjykata, pasi shqyrtoi kërkesën, vlerësoi çështjen ne tërësi, dëgjoi palët në kërkimin përfundimtar, bazuar ne nenet, 228, 229, 230, 233, 234, 238, 248, 249, 466 to Kodit to Procedurës Penale,
VENDOSI:
1. Vazhdimin e masës së sigurimit personal me karakter shtrëngues “arrest në burg” e parashikuar nga neni 238 i K.Pr.Penale, caktuar me vendimin Nr.112, data 20.10.2023 të Gjykatës së Posaçme të Shkallës së Parë për Korrupsionin dhe Krimin e Organizuar, ndaj shtetasit nën hetim Jamarbër Malltezi, i biri i Luan-it dhe Merxhane-s, i datëlindjes 09.11.1972, lindur ne Tirane dhe banues ne Tiranë, në adresën: “Rr. Mustafa Matohiti, Pall.7, Ap.8”, me profesion profesor në Universitetin Bujqësor të Tiranës, me arsim të lartë, profesor/doktor, me gjendje civile i martuar, me katër fëmijë, me gjendje gjyqësore i padënuar, me shtetësi shqiptare, i dyshuar për kryerjen e veprave penale “Korrupsioni pasiv i funksionarëve të lartë shtetërorë ose të zgjedhurve vendorë”, kryer në bashkëpunim, parashikuar nga neni 260 e 25 i Kodit Penal dhe “Pastrimi i produkteve të veprës penale ose veprimtarisë kriminale”, kryer në bashkëpunim, parashikuar nga neni 287 paragrafi i dytë i Kodit Penal.
2. Vazhdimin e masës së sigurimit personal me karakter shtrëngues “detyrimi për t’u paraqitur në policinë gjyqësore” e parashikuar nga neni 234 i K.Pr.Penale, caktuar me vendimin Nr.112, date 20.10.2023 te Gjykatës së Posaçme të Shkalles së Parë për Korrupsionin dhe Krimin e Organizuar, ndaj shtetasit nën hetim Fatmir Bektashi, i biri i Petritit dhe i Fitnetes, i datëlindjes 24.11.1957, me gjendje civile i martuar, me dy fëmijë, lindur në Tiranë dhe banues në Tirane, ne adresën: “Rr. Frosina Plaku, apartamenti nr.40/11”, me arsim të lartë, me profesion inxhinier mekanik, me gjendje gjyqësore i padënuar, me shtetësi gjermane dhe me kombësi shqiptare, i dyshuar për kryerjen e veprave penale “Korrupsioni aktiv i funksionarëve të lartë shtetërorë ose të zgjedhurve vendorë”, parashikuar nga neni 245 i Kodit Penal dhe “Pastrimi i produkteve të veprës penale ose veprimtarisë kriminale”, kryer në bashkëpunim, parashikuar nga neni 287 paragrafi i dytë i Kodit Penal.
2.1. Urdhërohet shtetasi nën hetim Fatmir Bektashi, të përgatitet të hënën e parë dhe atë të tretë të çdo muaji, ora 11:00 para oficerit të policisë gjyqësore Adelajda Metaj, pranë Prokurorisë së Posaçme kundër Korrupsionit dhe Krimit te Organizuar.
2.2. Urdhërohet shtetasi nën hetim Fatmir Bektashi të mos largohet nga territori i Republikës së Shqipërisë pa autorizimin e gjykatës, në referim të nenit 233 pika 1 të K.Pr.Penale “Ndalimi i daljes jashtë shtetit”.
2.3. Ndalohet përdorimi i pasaportës dhe i dokumenteve të tjera identifikuese të vlefshme për daljen jashtë shtetit, për shtetasin në hetim Fatmir Bektashi.
3. Për ekzekutimin e këtij vendimi ngarkohet Prokuroria e Posaçme kundër Korrupsionit dhe Krimit të Organizuar, përfaqësuar nga prokurorët Arben Kraja dhe Enkeleda Millonai.
4. Kundër këtij mund të bëhet ankim nga palët, brenda pesë ditëve, në Gjykatën e Posaçme të Apelit për Korrupsionin dhe Krimin e Organizuar.
U shpall në Tiranë, sot më datë 23.10.2023.
