Komiteti Drejtues i Dhomës së Avokatisë së Shqipërisë ka vendosur bojkotimin e të gjitha proceseve penale në vend, përfshirë hetimet dhe gjykimet në të gjitha shkallët, si dhe proceset në Gjykatën Kushtetuese, për periudhën nga 20 tetor deri më 25 tetor 2025.
Vendimi vjen si reagim ndaj arrestimit të avokatit Ulian Barjami, një ngjarje që Komiteti e cilëson si “tepër të rëndë”.
Sipas vendimit të shpallur sot, theksohet se pas kontaktit personal me avokatin Barjami dhe shqyrtimit të detajeve të rastit, Komiteti Drejtues ka vendosur unanimisht sa vijon:
Bojkot i proceseve penale: Për datat 20-25 tetor, avokatët do të bojkotojnë të gjitha proceset penale në hetim dhe gjykim, me përjashtim të çështjeve që lidhen me caktimin, ndryshimin, zëvendësimin ose shuarjen e masave të sigurimit.
Shtyrja e proceseve gjyqësore: Mospjesëmarrja e avokatëve në këto procese për shkak të bojkotit konsiderohet arsye objektive për shtyrjen e seancave gjyqësore.
Sanksione për moszbatim: Çdo avokat që nuk respekton vendimin për bojkot do të përballet me shkelje të rëndë disiplinore, e cila mund të çojë në procedim disiplinor nga Komiteti i Disiplinës, me masa që variojnë nga pezullimi deri në heqjen e licencës së ushtrimit të profesionit.
Kërkesë për hetim: Komiteti Drejtues i ka kërkuar Inspektorit të Lartë të Drejtësisë, Këshillit të Lartë Gjyqësor dhe Këshillit të Lartë të Prokurorisë të angazhohen urgjentisht dhe me përgjegjësi për shqyrtimin e çështjes së arrestimit të avokatit Barjami.
Zbatimi i vendimit: Përgjegjësia për zbatimin e këtij vendimi i është besuar Dhomave Vendore të Avokatisë.
Arrestimi i avokatit Ulian Barjami është pritur me shqetësim të madh nga komuniteti i avokatëve, duke çuar në këtë reagim të fortë nga Dhoma e Avokatisë.
