Një shtetas azerbajxhanas është arrestuar nga policia greke në ishullin e Kretës, i dyshuar për spiunazh.
Rasti është marrë në konsideratë nga autoritetet, pasi në Greqi, në ishullin e Kretës janë të vendosura bazat më të rëndësishme ushtarake të NATO-s.
Sipas informacioneve, autoritetet po hetojnë nëse 26-vjeçari po monitoronte bazën ushtarake në Suda, një strukturë strategjike për Greqinë, SHBA-të dhe aleancën e NATO-s në Mesdheun Lindor.
Sipas burimeve, i dyshuari ishte vendosur që nga data 18 qershor në një hotel pranë bazës detare dhe ajrore në pjesën perëndimore të Kretës.
Nga dhoma e shtetasit azerbajxhanas janë sekuestruar më shumë se 5 mijë fotografi, një laptop me programe enkriptimi dhe pajisje të tjera digjitale.
I dyshuari pritet të dalë përpara prokurorisë gjatë kësaj jave, ndërsa hetimet vazhdojnë për të zbuluar nëse ekziston një rrjet më i gjerë spiunazhi që mund të lidhet me incidentin në Qipro.
Rasti i Qipros lidhet me një person tjetër të dyshimtë të arrestuar, që pretendonte se ishte shtetas anglez dhe ishte vendosur në lagjen Zakaki të Limasolit në Greqi.
Dyshohet se ai është gjithashtu me origjinë nga Azerbajxhani, dhe së bashku me bashkëpunëtorë të tjerë, mund të ketë vepruar si agjent për përgatitjen e ndonjë sulmi të mundshëm në bazat e NATO-s.
Ky episod është i fundit në një seri alarmesh sigurie që kanë përfshirë bazat perëndimore në Mesdheun Lindor dhe në Gjirin Persik, të cilat konsiderohen objektiva potencialë për hakmarrje iraniane.
