Policia e Kosovës ka gjetur armatime në Banjskë të Zveçanit dhe beson se ato kanë qenë atje që nga sulmi që ndodhi në shtatorin e vitit të kaluar.
“kemi zhvilluar një kontroll shtesë në Hotelin ‘Rajska Banja’ dhe kemi gjetur dy jelekë antiplumb, AK-47, tetë karikatorë me fishekë dhe disa pajisje të tjera ushtarake”, tha për Radion Evropa e Lirë zëvendësdrejtori i Policisë së Kosovës për rajonin e veriut, Veton Elshani.
Më 24 shtator të vitit të kaluar, një grup i armatosur serbësh e ka sulmuar Policinë e Kosovës në Banjskë, duke lënë të vrarë rreshterin Afrim Bunjaku. Në shkëmbim e sipër të zjarrit janë vrarë edhe tre sulmues. Që atëherë, policia disa herë ka gjetur armatime në Banjskë të Zveçanit, por edhe në pjesë të tjera të veriut të Kosovës, të banuar me shumicë serbe.
