Luka Modric është i destinuar të thyej shumë rekorde si futbollist i Real Madridit.
Mesfushori kroat po kalon vitin e tij të 13-të si pjesë e Real Madridit, derisa në sfidën ndaj Celta Vigos ishte vendimtar.
Inkuadrimi i tij në lojë ishte i qëlluar nga Carlo Ancelotti, pasi veterani kroat dha një asistim fantastik për Vinicius Juniro i cili shënoi golin e fitores 1-2.
Por ndeshja ndaj Celta Vigos do të mbahet gjatë në mend nga Modric, i cili ka thyer një rekord të jashtëzakonshëm te Real Madridi.
Kroati tanimë është bërë lojtari më i vjetër në histori të Real Madridit që luan në një ndeshje zyrtare me 39 vite e 40 ditë mbi supe, duke thyer rekordin e mbajtur më parë nga Ferenc Puskas.
Përveç kësaj, fitorja ndaj Celta Vigos ishte shumë e veçantë për kroatin, pasi ishte fitorja numër 250 në La Liga për të me fanellën e Real Madridit.
39-vjeçari këtë edicion ka zhvilluar 13 ndeshje në të gjitha garat, teksa ka bërë edhe tre asistime, dy në kampionat dhe një tjetër në Ligën e Kampionëve. /Telegrafi/
