Ministria e Mjedisit dhe Turizmit dhe ajo e Brendshmja kanë thirrur në një takim prefektët për t’ju kërkuar të nisin marrjen e masave për sezonin e ri turistik.
Ministri Blendi Klosi kërkoi që të përcaktohet me kujdes kufiri mes plazheve publike dhe private.
Për ministrin e Brendshëm, Sandër Lleshaj, siguria në plazhe do të jetë kryefjala e këtij sezoni, ku toleranca do të jetë zero dhe asnjë biznes nuk do të funksionojë pa plotësuar kushtet.
Problematikat e sezonit turistik ministrat Klosi dhe Lleshaj i diskutuan në një takim me prefektët të cilëve iu kërkuan të nxisin kryetarët e bashkive të plotësojnë detyrimet e tyre ndër të cilat renditen dhe kushtet higjieno-sanitare e ndarja e zonave ku do të lejohet muzika e lartë.
Ministri, Blendi Klosi, tha se sezoni turistik në vendin tonë do të nisë që nga muaji prill e deri më 31 tetor.
Takimi më tej me 12 prefektët nuk u lejua të bëhej në praninë e mediave, duke mos bërë transparencë në lidhje me diskutimet e prefektëve me ministrat Klosi dhe Lleshaj.
