Pranvera Hyseni, astronomja shqiptare nga Kosova ka ndarë një lajm të mirë, gjersa ka njoftuar se Universiteti i Kalifornisë, një prej universiteteve më të mira në SHBA për astronomi planetare e ka shpërblyer për propozimin më të mirë të doktoraturës në Departamentin e Shkencave Planetare.
Hyseni këtë e ka bërë të ditur përmes një postimi në Facebook.
Ajo bën të ditur se ky çmim ndahet vetëm një herë në vit për kërkimin shkencor më të fuqishëm, me potencialin më të madh, dhe shoqërohet me një grant prej 3,000 dollarësh.
Lexoni të plotë postimin e saj:
Me gjithë zemër po e ndaj këtë: Universiteti i Kalifornisë, një prej universiteteve më të mira në SHBA për astronomi planetare, sot m’ka shpërbly për propozimin më të mirë të doktoraturës në Departamentin e Shkencave Planetare.
Ky çmim ndahet vetëm një herë në vit për kërkimin shkencor më të fuqishëm dhe me potencialin më të madh, dhe shoqërohet me një grant prej 3,000 dollarësh.
Për ata që s’e dinë çka po studioj: fokusi im janë asteroidët dhe trupat tjerë të vegjël në Sistemin Diellor, veçanërisht ata që përmbajnë ujë dhe përbërje organike. Unë specializoj se si materiet dhe kripërat organike (sidomos ato që përmbajnë azot) janë bartë dhe transformu si pasojë e qarkullimit të lëngjeve brenda këtyre trupave.
Këto janë procese që kanë ndodh para miliarda vitesh, por janë gjurmë që na ndihmojnë me kuptu si u shpërnda uji dhe materiali që ndikon në krijimin e jetës në fazat e hershme të sistemit tonë diellor. Ky është një projekt që përfshin eksperimente laboratorike, vëzhgime me teleskop, si dhe modelim teorik.
Është pikërisht ky lloj kërkimi mbi të cilin mbështeten shumë prej misioneve hapësinore.
Këtë çmim nuk e shoh vetëm si një arritje personale, por si një dëshmi që kureshtja, përkushtimi dhe dashuria për shkencën nuk varen nga vendi ku ke lind. Shpresoj që kjo arritje të jetë një shembull për çdo të ri/e që ka pasion për shkencën, sepse kurioziteti s’ka kufij.
Mirënjohje maksimale për komisionin dhe Departamentin Shkencave Planetare UC Santa Cruz. /Telegrafi/
