Gjykata e Posaçme e Apelit për Korrupsionin dhe Krimin e Organizuar (GJKKO) ka dhënë vendimin për Redjan Rrajën, duke e dënuar me burgim të përjetshëm. Rraja akuzohet në lidhje me atentatin ndaj ish-prokurorit, Arjan Ndoja. GJKKO ka dënuar me 35 vite burg edhe Arjol Halilajn, pasi mbi të rëndonte akuza se ka ndihmuar autorët për tu larguar nga vendi i ngjarjes.
Redjan Rraja, është një 34-vjeçar nga fshati Nikël i Fushë-Krujës. Ai u arrestua si një nga autorët kryesorë të atentatit ndaj ish- prokurorit të Durrësit, Arian Ndoja, shoferit të tij Andi Maloku, i cili mbeti i vrarë, si dhe për plagosjen e shtetasit, Landi Muharremi.
Gjykata pasi u kthye nga dhoma e këshillimit, në seancë gjyqësore publike dhe pasi dëgjoi palët në diskutimin përfundimtar dhe mori provat vendosi deklarimin fajtor të të pandehurit Redjan Rraja për veprën penale “Vjedhja”, kryer në bashkëpunim, në formën e grupit të strukturuar kriminal; “Mbajtja pa leje dhe prodhimi i armëve, armëve shpërthyese dhe i municionit”, kryer në bashkëpunim, në formën e grupit të strukturuar kriminal; “Vrasja e funksionarëve publikë”, mbetur në tentativë, në dëm të viktimës Arjan Ndoja; “Vrasja në rrethana të tjera cilësuese” me pasojë vdekjen e shtetasit Andi Maloku dhe mbetur në tentativë në dëm të viktimës Aleksandër Laho (Pëllumb Muharremi).
“Në bashkim të dënimeve, dënimi përfundimtar për të pandehurin Redjan Rraja ëshytë me burgim të përjetshëm.”- thuhet në vendimin e Gjykatës.
I pandehuri Redjan Rraja, do ta kryejë dënimin në një Institucion të Sigurisë së Lartë.
Vendimi për Ariol Halilajn
Gjykata deklaroi fajtor edhe të pandehurin Ariol Halilaj për veprën penale “Vjedhja”, kryer në bashkëpunim, në formën e grupit të strukturuar kriminal; “Mbajtja pa leje dhe prodhimi i armëve, armëve shpërthyese dhe i municionit”;
“Vrasja e funksionarëve publikë”, mbetur në tentativë, në dëm të viktimës Arjan Ndoja, kryer në bashkëpunim; “Vrasja në rrethana të tjera cilësuese” me pasojë vdekjen e shtetasit Andi Maloku dhe mbetur në tentativë në dëm të viktimës Aleksandër Laho (Pëllumb Muharremi).
“Në aplikim të nenit 55, paragrafi i parë i Kodit Penal, bashkimin e dënimeve dhe dënimin përfundimisht të të pandehurit Ariol Halilaj me 35 (tridhjetë e pesë) vjet burgim.”- thuhet në vendimin e Gjykatës.
Vuajtja e dënimit për të pandehurin Ariol Halilaj do të fillojë nga data e ekzekutimit të masës së sigurimit “arrest në burg” dhe këtë dënim ai do ta kryejë në një Institucion të Sigurisë së Lartë.
