Safet Bajri, një figurë e njohur dhe e fuqishme nga Shkodra, është shoqëruar në polici ditën e sotme. Sipas informacionit të fundit, Bajri u kap teksa lëvizte me një makinë të blinduar në qytetin e Lezhës.
Një operacion i koordinuar nga forcat e rendit ka rezultuar në arrestimin e Bajrit, i cili ka tërhequr vëmendjen për statusin dhe aktivitetet e tij në rajon.
Bajri pasi është ndaluar është dërguar në drejtorinë e Policisë së Shkodrës dhe është marrë në pyetje në lidhje me atentatin e ndodhur 2 javë më parë në Vaun e Dejës ku është qëlluar drejt një automjeti tip ‘Audi’ të blinduar. Bajri është shoqëruar si person në dijeni në lidhje me ngjarjen dhe më pas është lënë i lirë.
Mbrëmjen e 23 gushtit, 2 persona kanë qenë brenda automjetit tip “Audit”, të blinduar, kur ndaj tyre është qëlluar me breshëri kallashi. Deri më tani policia ka hezituar të bëjë publik identitetet e personave ndaj të cilëve është kryer atentati, për shkak të hetimeve. Gjithashtu dyshohet se në mjetin e blinduar ishte dhe një personazh i botës së krimit i shpallur në kërkim.
Deri më tani dy personat që dyshohet se kanë qëlluar drejt Audit janë vëllezërit Andrea e Aleksandër Prendi, të shpallur në kërkim nga policia. Dyshohet se mes dy grupeve ka pasur edhe shkëmbim zjarri, pasi në automjetin e vëllezërve Prendi janë gjetur gjurmë plumbash.
