Avokati i ish-zëvendëskryeministrit Arben Ahmetajt, Henrik Ligori ka deklaruar se klienti i tij ndodhet aktualisht në Mbretërinë e Bashkuar.
Duke folur para dyerve të Strukturës së Posaçme Antikorrupsion, avokati i Ahmetajt theksoi se ish-zëvendëskryeministri ndodhet pranë familjes dhe gruas së tij, ndërsa u shpreh se do të vijë në Shqipëri kur të fitojë lirinë.
“Ish-zëvendëskryeministri është në Angli. Aktualisht ndodhet pranë familjes së tij. Klienti im ndodhet pranë fëmijëve dhe gruas. Do të vijë në Shqipëri kur të ketë lirinë”, u shpreh Ligori.
Ndërkaq, Kuvendi miratoi më herët kërkesën e Strukturës së Posaçme Antikorrupsion për arrestimin e Arben Ahmetajt mbi aferën e incineratorëve.
Kuvendi votoi kërkesën me 117 vota pro, asnjë kundër, ndërsa kanë abstenuar 3 deputetë. 3 deputetët të cilët abstenuan ishin Fatmir Mediu, Agron Duka dhe Vangjel Dule. Midis 117 votave pro që i hap rrugë arrestimit të Arben Ahmetajt, ishte edhe Edi Rama.
Seanca u shoqërua me debate teksa ish-kryeministri Berisha kërkoi që kryeministri Rama të japë shpjegime për Arben Ahmetajn dhe aferën e incineratorëve. Pas fjalës së Berishës, kryeministri Rama u largua nga Kuvendi duke i lënë vendin diskutimeve të opozitës.
