Para Presidentit Bajram Begaj u betua sot Ministri i ri i Brendshëm, Taulant Balla.
Pas nënshkrimit të dokumentit zyrtar të marrjes së detyrës, ministri i ri i Brendshëm, Taulant Balla ka shtrënguar duart me Presidentin Bajram Begaj.
Në një ceremoni që nisi rreth orës 11:00 dhe zgjati pak minuta, të pranishme ishin kryetarja e Kuvendit, Lindita Nikolla, nënkryetarja e Kuvendit Ermonela Felaj dhe zyrtarë të tjerë të lartë.
Pas betimit në Presidencë, Ministri i ri i Brendshëm, Taulant Balla, ka hyrë për herë të parë në ambientet e këtij institucioni, i pritur nga ish-ministri Çuçi, zyrtarët më të lartë të Ministrisë së Brendshme, titullarët e institucioneve të varësisë e drejtues të tjerë.
Në fjalën e tij, Çuçi shprehu falënderime për stafin e Ministrisë Brendshme dhe vuri në dukje se arritjet në disa prej prioriteteve të punës së institucionit, janë rezultat i kontributeve të të gjithëve.
Ai shprehu vlerësimet më të larta për Ministrin e ri Balla dhe njëherësh i uroi atij suksese në detyrën e re, duke i dorëzuar formalisht edhe një dosje “exit-memo” me arritjet, prioritetet dhe një “road-map” për objektivat e ardhshme.
Taulant Balla në fjalën e tij të parë si Ministër i Brendshëm, falënderoi Çuçin për punën e bërë dhe shprehu se në fillim të javës së ardhshme do të bëjë të njohura për stafin dhe publikun, prioritetet që ai ka vendosur në detyrën e sapomarrë.
Balla do të jetë në krye të kësaj ministrie, pas shkarkimit të Bledi Çuçit një javë më parë (08.07.2023). Në të njëjtën ditë, kryeministri Rama mori vendimin për t’ia besuar Taulant Ballës këtë ministri.
Në një postim në Twitter, Rama njoftoi se në postin e ministrit të Brendshëm do të emërohet Taulant Balla.
“Të hënën do t’i dorëzoj zyrtarisht Presidentit të Republikës propozimet e mëposhtme! Falenderoj ministrin Bledi Çuçi për punën e tij si gjithnjë korrekte edhe në këtë detyrë dhe uroj që ministri i ri i Brendshëm Taulant Balla, të çojë më tej përpjekjen tonë të palëkundur shtetndërtuese edhe në këtë drejtim”, shkroi Rama në postimin e tij.
Kreu i qeverisë nuk dha arsyen e shkarkimit të Çuçit si ministër, megjithatë ky vendim erdhi në një kohë kur më herët gjatë javës së shkuar, ngjarja e ndodhur në Borizanë, dhuna e anëtarëve të fisit Rraja ndaj kushërinjve Maja, çoi në shkrirjen e Komisariatit të Krujës.
