Ministri i Brendshëm, Taulant Balla, gjatë një takimi me drejtuesit e Drejtorisë Vendore të Policisë së Kukësit, kërkoi publikisht që drejtorët dhe shefat e komisariateve ti japin fund menjëherë kontakteve të papërshtatshme me kriminelët, të cilëve, në jo pak raste, sipas tij, “u janë përcilljellë informacione sensitive të punës dhe të aksioneve policore”.
Në këtë takim ku prezantoi edhe drejtorin e ri të policisë së Kukësit, Artan Bajraktari, Balla theksoi se kjo rrugë është jo vetëm skandaloze sa të tjerat, “por edhe një karshillëk poshtërues për gjakun e Dëshmorëve të Policisë së Shtetit dhe për çdo qytetar të Republikës së Shqipërisë”.
“Në Kodin Etik thuhet që drejtuesit e Policisë së Shtetit nuk mund të ulen nëpër kafe e restorante as gjatë pune, as pas pune, përveçse për arsye familjare apo arsye të tjera për të cilat kanë vënë më parë në dijeni eprorët. Por vetëm kështu nuk ndodh, pasi, për fat të keq, ndodh që edhe drejtorë e shefa komisariatesh, të kenë kontakte të papërshtatshme nëpër lokale, ku u përcillen kriminelëve informacione sensitive të punës dhe të aksioneve policore. Natyrisht ka edhe në rrugë të tjera, por kjo rrugë që po them është skandaloze”- theksoi Balla.
Sipas tij, ky është një shembulli shumë i keq dhe demotivues për punonjësit e Policisë së Shtetit, që janë në varësinë e drejtorëve e shefave të këtij profili kaq të ulët moral.
Balla kërkoi nga strukturat policore në Kukës që të mirë-menaxhojnë dhe të tregojnë kujdes të shtuar për flukset e lëvizjeve të pushuesve që hyjnë apo dalin nga pikat e kalimit kufitar me Kosovën.
Po të hënën, ministri Balla ka prezantuar edhe Prefektin e qarkut të Kukësit, Albert Halilaj.
Sipas tij, ka ardhur koha për të rishikuar dhe ridimensionuar rolin e Prefektit në kuadër të reformës administrative territoriale dhe ligjit për vetëqeverisjen vendore.
