“Duhet të jemi krenarë që kemi një shumicë të madhe në PE në Këshillin Europian mes vendeve anëtare që janë të bindura që Shqipëria dhe Maqedonia e Veriut e meritojnë fillimin e bisedimeve, kjo është arritje për Shqipërinë”, deklaroi sot kreu i grupit parlamentar të Partisë Socialiste, Taulant Balla.
Duke folur në seancën plenare të Kuvendit, Balla tha se, “tre javë më parë teksa Gjermania përgatiste dokumentin për t’i thënë po Shqipërisë edhe në këtë sallë dëgjoja që zëra që thoshin jo po nuk është po, është një jo e veshur si po. Ndërsa sot duhet të jemi krenarë që Gjermania është vendi që drejton një betejë sa diplomatike sa politike, sa gjeopolitike për t’i dhënë Shqipërisë dhe Maqedonisë së Veriut rrugën e fillimit të bisedimeve për anëtarësim”.
“Ajo matricë Gjermane e detyrave të shtëpisë është instrumenti më i mirë që nuk e gjej arsyen pse presidenti francez nuk e gjen veten në këtë instrument”, u shpreh Balla.
“Teksa jemi në këtë sallë, një njeri që 28 vite i ka bërë dëme vendit ish-kryeminstri Sali Berisha, del pa pikë turpi dhe thotë falenderoj presidentin Makron që i thotë jo Shqipërisë. Nuk e imagjinoj dot të një njeri të jetë kaq keqdashës ndaj Shqipërisë”, u shpreh Balla.
Balla tha se, ajo që i shtyn ata t’i thonë jo Shqipërisë nuk ka të bëjë fare me Shqipërinë.
“Nuk ka të bëjë fare me çfarë ka bërë apo jo Shqipëria. Sepse Shqipëria ka bërë pikë për pikë, madje më shumë se sa iu tha dy vite më parë. Më shumë sesa iu tha një vit më parë. Dhe sigurisht sot jemi në kushtet kur 26 vende anëtare të BE mendojnë që Shqipëria i ka përmbushur, madje tejkaluar ato që i ka pasur si detyra shtëpie”, tha Balla.
Duke folur për krahasimin mes Shqipërisë dhe Maqedonisë së Veriut, Balla nënvizoi se, “ajo që na ndryshon ne nga Maqedonia e Veriut nuk është cilësia e reformave. Sepse nëse i referohemi cilësisë së reformave, reforma jon ënë drejtësi është 10 vite para asaj që duhej dhe duhet ta bëjë Maqedonia e Veriut në vitet pasardhëse. Ajo që sot Maqedonia e Veriut është ndryshe nga ne është pikërisht ajo që dhe kryeministri Rama jua tha një javë më parë. Është dallimi midis klasës politike në Maqedoninë e Veriut me klasën politike që ne për fat të keq kemi në krahun e opozitës. Dhe nuk e kam për ju këtu, por për ata që janë në rrugë”.
“Isha me kreun e Kuvendit në Parlamentin Europian dhe një prej deputetëve të djathtë të PE më vuri përpara një vlerësim që bënte PD të situatës politike në Shqipëri ku, pasi na përgojonte ne, merrej me përgojimin tuaj që keni tradhëtuar partinë tuaj dhe keni hyrë në Kuvend. Një parti politike që furnizon inboxet e deputetëve të PE dhe Bundestagut me thashetheme si në lagjet e rrethinave ku mblidhen plakat dhe bëjnë muhabet për gjithë dynjajnë”, tha Balla./ATSH/
