Ish-deputeti, Klevis Balliu, e sheh si detyrë parësore të opozitës në Kuvendin e ri të shtatorit ngritjen e një komisioni hetimor për të skanuar të gjithë atë që ai e cilësoi veprimtari kriminale dhe antikushtetuese të Kuvendit të vjetër që mbylli dje punimet.
I ftuar në Rtv Ora me gazetaren Besmira Pelushaj, ai thotë se vetëm kështu përgjegjësit për votimin e ligjeve për koncesione mafioze dhe kriminale do të mund të dalin para drejtësisë.
“Ne disponojmë fakte dhe mendoj se ka ardhur koha që përmes këtyre komisioneve hetimore parlamentare ti nxjerrim përgjegjësit përballë fakteve dhe dokumentave, qoftë për dosjen e inceneratorëve dhe dhjetëra koncesione të tjera. Qoftë për shembjen e Teatrit me votimin e ligjit antikushtetues. Shkelet Kushtetuta dhe çfarë ndodh? A mban njeri përgjegjësi nëse shkelet Kushtetuta? Gjykata Kushtetuese e ka dhënë vendimin, është ligj antikushtetues. Këta që e kanë votuar çfarë përgjegjësie kanë, çfarë dënimi marrin. Kjo mazhorancë kërkon shkarkimin e Presidentit të Republikës sepse sipas mendimit të tyre, pa prova dhe fakte dhe pa vendim nga Gjykata Kushtetuese, ai ka shkelur Kushtetutën. Po Erion Veliaj pse nuk shkarkohet, ose pse nuk hetohet për dosjen te Unaza. Pse nuk hetohet Afrim Qendro? Përkundrazi këta individë që janë të përfshirë në këto mega afera qindra miliona euroshe promovohen në poste kyçe si Afrim Qendro që po promovohet për kryebashkiak të Vlorës. Sa më hajdut të jesh dhe sa më i lidhur me krimin aq më lart shkon me Rilindjen”, tha Balliu.
Duke komentuar arrestimin e ish-kryebashkiakut të Lushnjes, Fatos Tushe, Balliu thotë se njeriu që sot është pas hekurave si hajdut ka menaxhuar fushatën e zgjedhjeve të 25 prillit.
Nga ana tjetër ai kërkon që hetimet të shtrihen përtej tij.
“Ky Tushe që u arrestua ka qenë aktiv gjatë fushatës, dimë gjë, se ka qenë kryetar bashkie. Ky hajduti që është sot në burg paska menaxhuar fushatën atje? Cila është lidhja e tij me Erjon Braçen, çfarë impakti dhe marrëdhënie biznesi, politike, ekonomike ka pasur Braçe me këtë njeri, është deputeti. Braçe është njeriu që e ka promovuar kryetarin e Bashkisë. Po Erjon Braçe për firmat që ai ka vënë, se nuk i ka vënë Rama, do të hetohet? Firmat për koncesionet, shumicën ja ka lënë Braçes ti firmosë. Do hetohen këta njerëz?”, tha Balliu.
