Zëvendëskryeministrja Belinda Balluku, njëherësh dhe ministre e Infrastrukturës dhe Energjisë, ka deklaruar se po punohet me intensitet për të siguruar furnizim me energji elektrike pa ndërprerje, por bëri thirrje për kursimin sa më shumë të saj.
Ajo tha se 1100 punonjës të OSHEE-së janë në territor, në zonat bregdetare, për t’iu përgjigjur çdo problematike të paraqitur.
Në takimin për prezantimin e planit të masave për sigurimin pa ndërprerje të energjisë gjatë këtij sezoni veror, zonja Balluku u bëri thirrje kryesisht biznesve për eficiencë në përdorimin e energjisë.
Ajo u kërkoi operatorëve të OSHEE-së edhe marrjen e të gjitha masave për të shkëputur çdo lidhje të paligjshme të energjisë.
“Do të ndërpritet çdo lidhje energjie e paligjshme”, tha ministrja Balluku.
Ajo foli për një situatë të mirë hidrike në vend.
“Kemi disponibilitet të plotë të sasisë së nevojshme të energjisë. Moti i mirë gjatë muajve të mëparshëm na ka favorizuar dhe niveli në HEC-in e Fierzës është i mirë. Ky mund të konsiderohet ndër vitet më të mira sa i përket prodhimit. Sfida është e Operatorit të Transmetimit për t’iu përgjigjur çdo defekti për të siguruar furnizim pa ndërprerje”, tha zonja Balluku.
Me këtë rast ajo kërkoi edhe intensifikimin e punës për realizimin sa më lart të nivelit të arkëtimeve, ndërsa bëri thirrje publike popullatës dhe bizn eseve për të kursyer sa më shumë energji elektrike.
