Qeveria britanike duhet të vendosë taksë mbi bankat për miliarda paund që ato marrin si interes nga Banka e Anglisë për rezervat që mbajnë në bankën qendrore, rekomandon një institut kërkimor. Rreth 22 miliardë paund në vit, që shkojnë te bankat si rezultat i programit të blerjes së bonove të Bankës së Anglisë, përbëjnë një subvencion për huadhënësit në kurriz të shërbimeve publike, tha Instituti për Kërkime mbi Politikën Publike (IPPR).
Një taksë e re mbi interesat që marrin bankat do t’i jepte ministres së financave, Rachel Reeves, më shumë hapësirë për të përmbushur rregullat fiskale. Pritet që Reeves të rrisë përsëri taksat në buxhetin e vjeshtës, pasi besohet se është larg objektivave fiskalë. Kjo vjen pas rritjes së taksave mbi punëdhënësit në buxhetin e parë vitin e kaluar.
Sipas analistëve, ai që nisi si një program për të nxitur ekonominë tani është kthyer në një shpenzim të madh për taksapaguesit. Paratë publike po përfundojnë drejtpërdrejt në xhepat e bankave komerciale për shkak të një dizajni të gabuar të politikës.
Bankat britanike mbajnë qindra miliarda paund rezervë në Bankën e Anglisë, kryesisht për shkak të lehtësimit sasior, program i nisur gjatë krizës financiare globale 2008-2009. Bankat paguhen mbi këto rezerva në bazë të normës aktuale të interesit të Bankës së Anglisë, që tani është më e lartë sesa gjatë pjesës më të madhe të programit të lehtësimit sasior. Humbjet e Bankës Qendrore mbulohen nga Thesari dhe në fund nga taksapaguesit.
Banka e Anglisë ka thënë se sistemi aktual është thelbësor për transmetimin e ndryshimeve të normës zyrtare të interesit në ekonominë e gjerë. Në qershor, institucioni mbrojti sërish programin e blerjes dhe shitjes së bonove të qeverisë pasi u kritikua nga disa politikanë, për shkak të kostove.
Në maj, Reeves përmendi mundësinë që Banka e Anglisë të fitojë para nga sistemi i ri që ofron rezerva për bankat, pasi institucioni kishte pësuar humbje të mëdha nga programi i blerjes së bonove. Thirrjet për rishikimin e këtij sistemi datojnë prej vitesh.
