Të gjitha partitë do të pësojnë dëme nëse vendi shkon sërish në zgjedhje pas ngërçit në Kuvend, ka thënë profesori i çështjeve juridike, Mazllum Baraliu, në “Interaktiv” të KTV-së të martën.
Ai ka thënë se vota e 9 shkurtit ka qenë mesazh për partitë që të bashkohen dhe se asnjëra s’mund të qeverisë më e vetme. Sipas tij, megjithatë, seancat e dështuara për konstituim kanë treguar se mesazhi nuk është kuptuar si duhet nga partitë.
Tek ka thënë se është zor që të parashikohet një rezultat, Baraliu ka thënë se “që do të ndodhë rënie për të gjithë dhe dëme për të gjithë, bile të mëdha”.
“Por qytetari kur e ka votuar kësaj radhe ia ka dhënë votën secilit subjekt politik dhe të gjithë bashkë duke i vënë në pat pozicion, por nuk ia ka dhënë besimin askujt se nuk e kanë merituar. Dhe porosia – konkluzioni logjik ka qenë që është i tillë që të bashkohen e të qeverisin bashkë. Ta kenë një qeveri të përbashkët sepse është dëshmuar se ato më herët s’ishin të duhura, të pasuksesshme, të dëmshme. Por këta s’e kuptuan mesazhin. Duke pasur inate politike, nuk u bashkuan. S’po bashkohen e nëse nuk bashkohen dhe shohin rizgjedhje përgjigja dhe vendimi i votuesit do të jetë shumë befasues dhe madje shumë i dëmshëm për ta”, ka thënë ai.
Në zgjedhjet e 9 shkurtit, Lëvizja Vetëvendosje doli e para dhe siguroi 48 ulëse në Kuvend. E që nga 15 prilli, kjo parti nuk ka arritur të marrë postin e kryeparlamentarit pasi propozimi i saj, Albulena Haxhiu, nuk ka marrë më shumë se 57 vota.
