Barcelona ka barazuar 1:1 me Napolin në ndeshjen e parë të një të tetës së finales të Ligës së Kampionëve. Barazimi si mysafir mund të llogaritet rezultat i mirë, por Barcelonës në ndeshjen e kthimit, më 18 mars, do t’i mungojnë lojtarë të rëndësishëm.
“Nuk do të jemi në gjendje të llogarisim në Sergio Busquetsin dhe në Vidalin në ndeshjen e kthimit, por do të gjejmë lojtarët për të mbuluar mungesën e tyre”, ka thënë trajneri i Barcelonës, Quique Setien, përcjell faqja zyrtare e UEFA-s.
Busquets e Vidal do të jenë të suspenduar për shkak të kartonëve. Vidal u përjashtua në fund të ndeshjes me Napolin. Po ashtu në fund të ndeshjes është lënduar Gerard Pique.
Ndërkohë trajneri i Napolit, Gennaro Gattuso është optimist për ndeshjen e dytë.
“Barcelona ka bërë fare pak në sulm. Më pas ne bëmë atë gabim dhe Barcelona shënoi. Nëse shfrytëzojmë rastet në ndeshjen e dytë, ne mund të avancojmë”, ka thënë Gatusso.