Barcelona e ka demoluar me rezultat dhe lojë ekipin e Osasuna, për të fituar 4 me 0 ndeshjen e sontme, që u mundësoi atyre të dalin në pozitën e tretë një javë para dy ndeshjeve vendimtare, ndaj Galatasaray dhe Real Madrid.
Ekipi i drejtuar nga Xavi për asnjë moment nuk e vuri në dilemë epilogun e ndeshjes. Fillimi i ndeshjes tregoi menjëherë se çfarë trajektore do ta merrte ndeshja. Të sigurtë dhe me kompaktësi për lakmi, ekipi blaugrana iu qasë ndeshjes që prej minutës së parë.
Po luhej minuta e 13-të kur mesfushori i talentuar, Gavi, u rrëzua me anë të një shtyrje nga mbrapa prej kundërshtarit dhe gjyqtari nuk hezitoi të sinjalizojë penalti në favor të Barcelonës. Nga pika e bardhë i saktë u tregua Ferran Torres.
Goli i dha shumë zemër dhe disponim për lojë këtij të fundit, pasi vrapoi shumë për t’u liruar dhe shërbyer brenda zonës. Diçka të tillë e vërejti Dembele, ku përmes një pasimi diagonal tokazi tejet të zgjuar, nxori Ferran Torresin përballë portierit, kur ky i fundit s’kishte se si të gabonte, por në mënyrë të saktë goditi dhe kaloi në epërsi të dyfishtë ekipin vendas.
Nga ky moment Barcelona mori akoma më shumë vetëbesim, ndërsa e njëjta nuk mund të konstatohet për ekipin kundërshtar.
Dani Alves në një moment që ishte duke bërë një seri fintash, vendosi të pasojë shkurtazi për Dembele, i cili i gjendur në një pozitë këndore, vendosi që të mos provojë driblimin, por harkoi pa menduar gjatë. Ky harkim ishte tokazi dhe Aubameyang u tregua si një sulmues me intuitë, meqë përcolli topin dhe zgjati këmbën për ta devijuar topin dhe për ta dërguar në shtyllën e parë të portës.
Me rezultatin që shkoi në 3 me 0, loja u bë gjithnjë e më e parashikueshme, me Barcelona që dominoi dhe Osasuna që ishte e pafuqishme t’u rezistojë sulmeve të tyre.
Epilogu 3 me 0 dërgoi skuadrat në pauzën para fillimit të pjesës së dytë.
Fillimi i pjesës së dytë u shënua me ulje të tempos së lojës, ku Barcelonës i mjaftoi menaxhimi i lojës dhe i rezultatit, duke kursyer edhe energji, meqë javën që vjen e presin dy transferta të zjarrta, ato në Stamboll dhe Madrid, në kuadër të Ligës së Evropës dhe derbit të përjetshëm të La Ligas.
Tek në fund, kur mungonte një çerek lojë, ishte Riqui Puig ai që insistoi të shënonte dhe ia doli ta gjejë golin, me një fintë të bukur ndaj portierit, ku pastaj pjesa e mbetur ishte e lehtë për të, duke e dërguar topin në rrjetë me portën zbrazur.
Kësisoj, Barcelona stabilizon shumë pozicionimin e saj tabelar, duke u renditur në vendin e tretë, me 5 pikë disavantazh nga Sevilla, por me një ndeshje akoma për ta rekuperuar. Xavi ia ka dalur t’i japë domethënie pjesës së dytë të sezonit të Barcelonës në këtë sezon, qëkur i njëjti është emëruar trajner i gjigantit spanjoll.
