Kryenegociatori i BE-së, Michel Barnier paralajmëroi sot, katër ditë para Brexit, se ndarja do të ketë pasoja negative dhe se negociatat për marrëdhëniet e ardhshme mes Londrës dhe 27 vendeve anëtare do të shërbejnë vetëm për të kufizuar dëmet.
“Është absolutisht e qartë se do të ketë pasoja negative. Ciladoqoftë marrëveshja që të arrijmë në marrëdhëniet tona të ardhshme, Brexit do të jetë gjithmonë një operacion për të kufizuar dëmet”, u shpreh Barnier, në një fjalim në Universitetin “Queen’s” në Belfast.
Në fillim të javës së hapit të madh historik, zyrtari europian vizitoi me radhë Republikën e Irlandës, anëtare e BE-së, pastaj provincën britanike të Irlandës Veriore.
Në këto territore, më të ekspozuarat ndaj pasojave të ndarjes, ai paralajmëroi se po hapet një fazë e re e vështirë.
