Lideri i demokratëve Lulzim Basha ka risjellë sërish në vëmendje nevojën për të rritur numrin e testimeve për rastet e dyshuara me koronavirus në Shqipëri.
Në një konferencë virtuale me gazetarët, Basha deklaroi se qeveria s’mund të vijojë t’i mbajë mbyllur në shtëpi shqiptarët pa asnjë plan për të nesërmen. Basha shtoi se qeveria duhet të testojë rregullisht stafet mjekësore dhe punonjësit e policisë, por edhe ata punonjës të administratës e persona që janë në shërbim të tregtisë në këto kohë të koronavirusit. Sipas Bashës qeveria po shpall masa sporadike dhe në realitet nuk ka një plan të qartë, qoftë për parandalimin e përhapjes së Covid-19, e qoftë për planin ekonomik.
Deklarata e Bashës:
Dua të bëj një paraqitje të disa çështjeve kryesore që kanë qenë në qendër të vëmendjes së qytetarëve edhe të opozitës. Të dhënat e fundit tregojnë një zgjerim të hartës së të infektuarve, ne Kukes dhe Mallakaster.
Sot kemi 6 anëtarë të personelit mjekësor të infektuar. Kjo sjell vëmendje të rritjes së testimit. Duke nisur me testimin e stafeve mjekësore dhe me punonjësit e vijës së parë, të policisë, të Forcave të Armatosura, të administratës, furnitorët, njerëz që punojnë në shërbim të tregtisë. Testim dhe prekja e situatës në thellësinë e saj do të na japë shifra të sakta dhe përhapjen e vërtetë të infeksionit. Në besimin tonë, testimi nuk po bëhet në masën e duhur.
Kërkesës tonë për testimin i janë bashkangjitur edhe zëra të ekspertëve kombëtarë, dhe zëra të maxhorancës, ndaj përsëris sot, që të ndryshohet strategjia për testimin. Nëse ne prekim sipërfaqen e problemin, majën e ajsbergut, do ta kemi të vështirë që të drejtojmë vendin drejt hapjes, që t’i japim fund qëndrimit në shtëpi dhe mbylljes në ekonomi. Është e pamundur që njerëzit të mbahen në shtëpi pa plan.
Sa i përket pasojave që kjo ka te qytetarët dhe stafet mjekësore, nëse ne lejojmë infektimin e mjekëve dhe infermierëve, ne dobësojmë vijën mbrojtëse që ka shoqëria. Prioritet absolut duhet të jetë zbulimi i infeksionit, gjurmimi i kontakteve.
Ndaj kërkesa jonë është që në bazë të ligjeve në futi të normohen përmes VKM, për të bërë të mundur gjurmimin edhe izolimin e infeksionit, pa të cilin karantina s’do të ketë kuptim. Ky proces kërkon protokolle të qarta nga njerëzit në terren. Dua të përsëris dhe një herë thirrjen për pajisje mbrojtëse për personelin mjekësor.
