“Drafti për Reformën Zgjedhore, do të jetë gati në dhjetor. Për opozitën nuk do të ketë dhe nuk ka alibi për të vonuar zgjedhjet e parakohshme parlamentare dhe zgjedhjet vendore kushtetuese në të njëjtën ditë, si rrugëdalja e vetme nga kriza”, ka deklaruar sot kryetari i PD-së, Lulzim Basha, pas takimit të Presidentit Meta me partitë opozitare.
Kryetari i PD-së Basha tha se “gjatë takimit me Presidentin Meta tha se u njohëm me prova tronditëse të asaj që kemi ditur dhe thënë përpara, të ndërhyrjes flagrante të kryeministrit në procesin e Reformës Zgjedhore dhe konkretisht në ndërhyrjen e procesit të emërimit të gjyqtarëve të Gjykatës Kushtetuese”.
“Këto prova dhe fakte tronditëse vërtetojnë se qëllimi i kësaj qeverie është jo zbatimi i Reformës në Drejtësi, por kapja e institucioneve të drejtësisë dhe në veçanti kapja e Gjykatës Kushtetuese”, tha ai.
Basha tha se” PD dhe aleatët tanë, e kanë konsideruar një grusht kushtetues, por përtej kësaj dhe një provë më shumë se më këtë qeveri, Reforma në Drejtës është e rrezikuar, drejtësia e pavarur që nuk mbron, por ndëshkon politikanët e korruptuar dhe të lidhur me krimin, mbetet një iluzion”.
“PD dhe opozita e bashkuar qëndrojnë për një Reformë në Drejtësi sipas Kushtetutës. Ne kërkojmë vënien në funksionim sa më shpejt të Gjykatës Kushtetuese të Gjykatës së Lartë të SPAK dhe BKH, sipas Kushtetutës dhe jo sipas planeve, anktheve të qeverisë”, tha ai.
Po ashtu, Basha tha se diskutuam me Presidenti Meta për zgjidhjen e krizës politike. “Prej më shumë se 3 muajsh, kjo detyrë është shtruar edhe nga institucionet ndërkombëtare dhe në veçanti nga fuqia më e madhe evropiane nga Gjermania, përmes mocionit të përbashkët të Bundestagut dhe nga partnerët tanë strategjik. Prej më shumë se dy muajsh, opozita ka shprehur gatishmërinë e saj për të kontribuuar përmes një dialogu transparent për një Reformë Zgjedhore dhe zbatimin e kësaj reforme siç e kërkon Bundestagu. Prej më shumë se 4 muajsh, Rama ka refuzuar dialogun dhe ndërmjetësimin ndërkombëtar të ofruar të paktën në katër raste nga institucione ndërkombëtare, në një tentativë për të mbuluar krizën e thellë ku ndodhet vendi”, tha ai.
Më tej, Basha shtoi se “shtyrja e afatit të Komisionit të Reformës Zgjedhore është një tjetër përpjekje për t’i hedhur hi syve shqiptarëve dhe faktorit ndërkombëtar”.
“Opozita e Bashkua as nuk ka kërkuar as nuk kërkon dhe as nuk mbështet shtyrjen në kalendat greke të Reformës Zgjedhore. Javën e ardhshme opozita e bashkuar do të konkretizojë produktin e saj që është dokumenti strategjik për Reformën Zgjedhore ne amendamente e të gjitha ligjet për ndërhyrjen e nevojshme, pra propozimin e plotë për reformën zgjedhore, ndërkohë që na ana tjetër kemi patur refuzim të dialogut, kushtëzim të dialogut dhe sabotim të Reformës Zgjedhore”, tha ai.
Ai tha se “ne do të vazhdojmë të insistojmë për zgjedhje të parakohshme dhe do të marrim hapat e nevojshëm si opozitë duke u bërë thirrje qytetarëve, të cilët janë në shumicë numerike për zgjedhje të parakohshme parlamentare për zgjidhjen e kësaj krize, që po shkatërron shpresën e shqiptarëve, për të marrë pastaj të gjithë hapat e nevojshëm që i takojnë një shoqërie të civilizuar nëse përballet me një qeveria autokrate të paligjshme që pengon shprehjen e vullnetit të popullit përmes zgjedhjeve të lira dhe të ndershme”, tha ai./ATSH/
