Kryetari i Partisë Demokratike, Lulzim Basha ka zhvilluar një takim me banorët e zonës së Malësisë së Madhe, duke u njohur me disa nga shqetësimet dhe problemet e banorëve të asaj zone.
Në fjalën e tij, Basha theksoi se beteja që opozita po zhvillon sot është për vlerat e lirisë dhe demokracisë.
“Sot beteja jonë zhvillohet për një vlerë themelore, për vlerat e lirisë, për vlerat e demokracisë, pa të cilat nuk mund të ketë çelje të dyerve të Europës për Shqipërinë. Punët shkojnë keq e më keq, dhe për fat të keq një nga dramat më të mëdha që po përjeton Malësia, sikundër edhe Shqipëria, është rritja e frikshme e numrit të personave që largohen nga shtëpitë e tyre, në emigracion pjesa dërmuese, apo në disa raste drejt qytete për të kërkuar shanse për një jetë më të mirë. Isha në Hot dhe ajo që pashë ishte mbyllja masive e shkollave, zvogëlimi i klasave për shkak të largimit të prindërve. Gjimnazi i Koplikut ka zbritur nga 700 në 350 gjimnazistë”, theksoi Basha.
Në fjalën e tij, Basha nuk kurseu edhe akuzat në drejtim të Kryeministrit.
“Kjo nuk është demokraci, kjo nuk është liri, kjo nuk është Europë. Edi Rama ka instaluar një diktaturë të re, diktaturën e hajdutëve dhe kriminelëve, ku nuk ka vend për njeriun e ndershëm dhe kjo është arsyeja se përse biznesi nuk gjen vend për zhvillim. Regjimi i Edi Ramës është një regjim i mbaruar politikisht. Beteja jonë është për ta shembur këtë sistem”, tha Basha./ATSH/
