Kryedemokrati Lulzim Basha ka dalë në një deklaratë për mediat fill pas konferencës së kryeministrit Edi Rama për sistemin tatimor.
Basha e cilëson Ramën si “Tirja i qeveri”, ndërkohë që shton se PD ka gati një plan për rimëkëmbjen ekonomike të vendit, për të cilën do ta ndihmojë edhe BE.
“Ditët e kësaj qeverie janë të numëruara. Tirja e qeverisë që iu ka marrë paratë qytetarëve shqiptarë, iu ka marrë paratë familjeve shqiptare, ku 96% e tyre paguajnë më shumë taksa. I ka marrë para biznesit shqiptar, ku këto para në vend që t’i kthejnë në shërbime, në investime ia ka dhënë një grushti klientësh të vetët, nuk mundet më të fshihet dhe as të fshehë më vetën e tij duke fajësuar këdo. Përfshirë edhe BE.
Është koha për ndryshim. Është koha për ta larguar këtë qeveri dhe këtë kryeministër të papërgjegjshëm që është shkaktari dhe burimi i kësaj krize. Ne kemi një plan konkret ekonomik. Së bashku me shqiptarët më 25 prill do të heqim të keqen dhe do të nisim rrugën e ndryshimit. Në këtë rrugë ndryshimi partnerët tanë strategjikë, përfshirë BE do të na ndihmojnë për një plan ekonomik”, tha Basha.