Ndërkohë që kryeministri Edi Rama ka folur për mospajtimet mes Qeverisë së Kosovës dhe asaj të Shqipërisë rreth nismës për “Ballkanin e hapur” dhe ka arsyetuar mbështetjen për të, atij i ka reaguar lideri i PD-së, Lulzim Basha. Sipas Bashës, për Shqipërinë do të ishte e udhës të fokusonte të gjitha energjitë te Procesi i Berlinit, te thithja e fondeve të vëna në dispozicion dhe në përkrahjen për Kosovën si shtet i barabartë mes shteteve te rajonit, në çdo marrëveshje e dokument
Bashkëpunimi rajonal nuk mundet kurrë të nisë nga Novi-Sadi, por nga Mitrovica, shqetësimi ynë duhet të jenë shqiptarët e Luginës së Preshevës, siç janë për Vuçiqin serbët e Kosovës. Kështu ka komentuar lideri i PD-së, Lulzim Basha, nga foltorja e Kuvendit të Shqipërisë, rreth nismës “Ballkani i hapur” dhe marrëdhëniet e kryeministrit Edi Rama me Albin Kurtin e Aleksandar Vuçiqin.
“Marrëdhëniet ndërshtetërore dhe fqinjësia e mirë ngrihen mbi baza proporcionaliteti dhe jo vasaliteti”, ka deklaruar Basha, për të shtuar se pas çdo fotoje që Vuçiq bën me Ramën maskohet ambicia e tij për atë që ai e quan “bota serbe”.
“Çfarë e motivon përbuzjen e Procesit të Berlinit të iniciuar nga Gjermania dhe që ka mbështetjen politike e financiare të BE-së, vendeve kryesore anëtare të Unionit e që mbledh së bashku të gjitha vendet e Ballkanit, dhe çfarë të detyron të investohet kaq fort në një iniciativë paralele të krijuar në Novi-Sad e si autoritetin më të lartë ka Vuçiqin?”, ka pyetur Basha.
Sipas Bashës, për Shqipërinë do të ishte e udhës të fokusonte të gjitha energjitë te Procesi i Berlinit, te thithja e fondeve të vëna në dispozicion dhe për t’i dhënë Kosovës vendin që i takon, si shtet i barabartë mes shteteve te rajonit, në çdo marrëveshje e dokument.
“Por, ti ke prioritet iniciativën e Novi-Sadit, e cila mbahet mend veç për sulmet që ti i bën lidershipit të Kosovës sa herë mblidheni për resmen e rastit dhe për turpin tënd edhe kur në krah keni iniciatoren e Procesit të Berlinit, siç ndodhi 2 ditë më parë… Dhe Pas çdo resme që Vuçiq bën me ju, maskohet ambicia e tij për atë qe ai e quan “bota serbe”, fshihet spastrimi etnik i Luginës së Preshevës përmes pasivizimit të adresave, privimi që iu bën shqiptarëve të tri komunave, Preshevës, Medvegjës e Bujanocit të së drejtës për t’u punësuar e zhvilluar ekonomikisht, fshihen ambiciet për të kontrolluar dhe tollovitur Malin e Zi, siç ndodhi pak kohë më parë kur kërcënoi luftë civile. E reagimi yt ndaj kësaj sjelljeje janë sulmet ndaj liderëve të Kosovës, që refuzojnë një gjë të tillë”, është shprehur Basha.
E kryeministri i Shqipërisë, Edi Rama, në seancën e Kuvendit, teksa ka pasqyruar programin politik për mandatin e tretë qeverisës 2021-2025 është ndalur gjatë në politikën e jashtme. Rama mori në mbrojtje nismën “Ballkani i hapur” dhe theksoi se kjo iniciativë është në kuadër të Procesit të Berlinit dhe nuk përmban asgjë më shumë sesa përmbushja e katër lirive themelore të Shengenit. Kundërshtitë e Kosovës për këtë nismë, Rama i cilësoi si të nxitura dhe theksoi se të dyja vendet duhet të bashkëpunojnë me njëra-tjetrën, por nuk duhet të ndërhyjnë në vendimet e brendshme të qeverive respektive.
“Ballkani i hapur nuk është lojë e Serbisë, dhe as konspiracon rus apo kinez për të ringjallur Jugosllavinë. Nuk është assesi devijim nga rruga e anëtarësimit në BE apo nga kornizat e Procesit të Berlinit. Të gjitha këto janë përralla me gogol për të treguar pranë zjarrit digjital në një luftë nga kolltuku e nga Facebook me një armik të deridjeshëm, të cilin Kosova e Shqipëria e kanë mundur përfundimisht si armik në luftën reale me bomba e pushkë, sot e 20 e kusur vjet përpara falë SHBA-së e UÇK-së”, tha Rama.
Sipas tij, u takon autoriteteve të Kosovës të marrin vendimin.
“Ama e njëjta gjë vlen dhe anasjelltas. Për Shqipërinë vendosin autoritetet e Shqipërisë, edhe ata duhet të respektojnë vendimet tona. Nëse nuk na pëlqejnë vendimet e njëri-tjetrit t’i diskutojmë vëllazërisht me mendje të hapur, por kurrsesi t’i shpallim si rusokinez e nostaligjiko sllav ata që mendojnë ndryshe.
