Kryetari i Partisë Demokratike, Lulzim Basha, ka hipur në zetorin e fermerit Lulzim Noreci në fshatin Mizë të Divjakës gjatë kohës që ai punonte për të dëgjuar me vëmendje të gjitha problemet që ai shtronte dhe çfarë priste nga qeveria e re pas 25 prillit.
Unë e kam dëgjuar dhe e kam studiuar programin dhe më pëlqen shumë mbështetja e bujqësisë, subvencionet. Më duken ëndërr! I kam thënë Alibeajt. Më duket si ajo historia që tregojnë “do të martojmë o bir”- S’besoj baba!”.
Basha e ka pyetur në veçanti fermerin nëse e dinte për subvencionet që jepte Kosova dhe ai tha se ka marrë vesh kur nuk shitej qepa në Divjakë!
Unë nuk e dija se nuk jam ekonomist, jam bujk, por mora vesh se …sa gjysma e Shqipërisë! Ku shkojnë këto para të këtij populli? E do Edi Rama, trangullin, domaten, pataten e Divjakës?!
Ne duhet të jemi krenar që jemi nga Divjaka, ky vend i begatë. Prodhohet, problem është shitja. Nuk kemi mbështetje nga shteti absolutisht! Po qe për subvencione, nuk flitet fare! Këtu është makabër, nuk të njeh fare. As karburant, sepse karburanti është baza jetike e një. Nuk ta njeh njeri, unë po të them kam 7 hektarë tokë që po i administroj, ore, absolutisht zero! Zero! Nuk të mbështet njeri fare, nuk do t’ia dijë se prodhon, se akoma je gjallë apo ke vdekur! Absolutisht! E gjen mundësinë ta blesh vetë? u rrit dapi dhe nitrati tani para zgjedhjeve. 1200 lekë kuintali. Çmenduri! Unë i marr tokat me qira, kam 7 hektarë toka, në rëra i kam 10’000 mijë lekë dynymi, dhe në dhera i kam 15’000 lekë dynymi. Toka jonë punohet tre herë, unë po të marr ekonomistë dhe ekonomisë i bie llogarisë, unë dal piramidë, i falimentuar!” – tha Lulzim Noreci.
Basha tha se problemet e fermerëve janë të ditura tashmë dhe se qeveria nuk ka mbështetur fermerët as sa vendet e rajonit. Ai përsëriti programin e Partisë Demokratike për bujqësinë, i cili parashikon 100 milion euro subvencione për fermerët, 150 milion euro për infrastrukturën bujqësore dhe uljen e çmimit të naftës me 240 lekë.
“Unë nuk mendoj se i bëhet vonë atij për produktet e Divjakës por nuk është çështje që dua të diskutoj me ty. Ajo që dua të them është që në qoftë se Kosova me gjysmën e buxhetit të Shqipërisë arrin të japë subvencione, në qoftë se Maqedonia me një buxhet afërsisht sa i Shqipërisë jep 100 milionë euro, pse mos të japim ne? Po e the ti ku shkojnë paratë? Kjo është. Pra, me 25 prill vendimi që do marrësh është ku do të shkojnë paratë. Atje ku kanë shkuar këto 8 vite apo do vijnë për subvencione, për ndihmë për ju?!”
“Vendimi im do të vejë tek Partia Demokratike, – tha fermeri, – në bazë të atij program që ke ndërtuar ti!”
