Lulzim Basha ka akuzuar ish kryetarin e PD se ka si qëllim t’ia dorëzojë këtë forcë politike ilir metës. Madje ai thekson se kjo duket në nënshkrimin e koalicionit. Në takimin me mbështetësit në tiranë ai theksoi se do të jetë me opozitë me Ramën ku shtoi se rotacioni I pushtetit është një veprim I shëndetshëm.
Regjistrimi i komisionit të rithemelimit të Partisë Demokratike si koalicion me Lëvizjen Socialiste për Integrim, sipas Lulzim Bashës tregon lidhjen mes palëve.
Basha: Ju e dini që në 30 qershor 2019-të nuk pati një proces normal votimi. Pati votime si në komunizëm, një parti që vet votuan, vet numëruan dhe iu desh 2 muaj për të nxjerr rezultatin, imagjinoni. Dhe prape iu dolën 4-5 me rekorde kriminale, që kanë ikur. Dhe tani për shkak të këtyre, gjetën sebep për procesin e 6 Marsit. Shikoni si kanë dal hapur, hapur fare.
Madje në takimin me mbështetësit në Tiranë ai solli në vëmendje largimin e Sali Berishës nga grupi parlamentar, duke shtuar se ka marrë vendime për të mos lejuar përçarjen e kësaj force politike.
Basha: S’po flas ndaj meje si kryetar i partisë, se vet zgjodha t’i vija gjoksin kësaj, pikërisht që mos të futej përçarja përmes demokratëve apo deputetëve, zonjave, anëtarëve të kryesisë.
Në fushatën e nisur Basha shton se nuk kërkon vetëm afrim të figurave të reja në selinë blu, por një ndryshim radikal.
Basha: Çfarë duan shqiptarët?! Duan ndryshim! Çfarë është ndryshimi?! Nuk është ndryshim karrigesh! Nuk është ndryshim fytyrash! Dua një ndryshim, i cili, njësoj si para 32 vjetësh, është një ndryshim i thellë, jo vetëm politik, por kulturor.
Me Ramën Basha thotë se do të jetë në opozitë, por se nevoja për ndryshimin e qeverisjes sipas tij është domosdoshmëri.
Pavarësisht takimeve me anëtarësinë, Basha ende nuk ka zyrtarizuar se cilët do të jenë kandidatët në zgjedhjet e 6 marsit në 6 bashki.
