Kryeministri Albin Kurti u takua sot me kryetarin e PD-së Lulzim Basha në vizitën e tij të parë si kryeministër i Kosovës.
Pas takimit në një prononcim për mediet, pas takimit me Bashën, Kurti tha se “Kuvend e Qeveri do të bashkëpunojmë në mënyrë që Kosova dhe Shqipëria të jenë në nivel të detyrës jo vetëm zyrtare, por dhe historike për qytetarët tanë të cilët janë edhe me varfërinë më të madhe, por dhe me papunësinë më të madhe jo vetëm në rajonin tonë”.
“Pra, është është obligim i yni që si politikanë, kudo që jemi, të jemi tërë kohën në shërbim të qytetarëve edhe të Kosovës, edhe të Shqipërisë për të ngritur dinjitetin dhe mirëqenien e tyre”, tha ai.
Nga ana e tij Basha tha se e siguroi kryeministrin Kurti se për PD dhe opozitën e bashkuar prioritetet e bashkëpunimit me Kosovën janë të qarta. “Ne do të bëjmë gjithçka për të ndihmuar në tregtinë e lirë, në integrimin ekonomik të Shqipërisë dhe Kosovës për t’u dhënë shanse për punësim qytetarëve tanë dhe në veçanti rinisë, për të ndalur shpopullimin që është produkt i drejtpërdrejtë i korrupsionit dhe i kapjes së shtetit nga krimi i organizuar, sikundër dhe për angazhimin tonë sot dhe nesër për të vazhduar fuqimisht mbështetjen nga republika e Shqipërisë për Republikën e Kosovës për njohjet ndërkombëtare dhe anëtarësimin e Kosovës në organizmat ndërkombëtare, si kundër dhe për heqjen e vizave për qytetarët e Kosovës”, u shpreh Basha.
“Kryeministri Kurti, qeveria, institucionet e Kosovës dhe qytetarët e saj mund të mbështeten plotësisht tek PD dhe opozita e bashkuar për të dhënë çdo ndihmë dhe për të marrë çdo vendim që do të mbështesë objektivat e tyre, sot në opozitë dhe kur nesër qytetarët të na besojnë qeverisjen e vendit me votën e lirë dhe të ndershme”, tha ai./ATSH/
