Kryetari i Partisë Demokratike, Lulzim Basha, ishte sot në një familje në Kamzë, e cila ka probleme me legalizimin.
Kryefamiljari Gjergj Palucaj, tha se edhe pse i ishtë premtuar që në 2013-ën që do t’i jepej legalizimi, ai ende dhe sot endet zyrave të shtetit për të marrë legalizimin, por që nuk po gjen zgjidhje.
Për këtë problematikë që shtrihet në të gjithë vendin, Basha tha se legalizimet kanë qenë një nga gënjeshtrat më të mëdha të kësaj qeverie.
Por, tha ai, “kjo do të marrë fund pas 25 prillit, ku procesi me legalizimet do të përmbyllet, pasi ky është një borxh i Partisë Demokratike ndaj qytetarëve”.
“Tani i gjithë ky proces është kthyer në një proces korrupsioni. E para e punës, ai i mashtroi shqiptarët, siç mashtroi me 300 mijë vendet e punës, ashtu mashtroi edhe me legalizimet falas, edhe me shëndetësinë falas. E dyta e punës, e ka përdor për të pasuruar dhe mbushur xhepat e administratës së korruptuar se kanë vajtur njerëz të korruptuar kudo. Ti po me thua që 6 % i kanë marrë pjesa tjetër jo. Pse? Sepse për të edhe çështja e legalizimit nuk është çështje e vuajtjes, e gjakut, e djersës, e mundit tuaj por është çështje e pushtetit të tij politik”, tha Basha.
Tani, vijoi ai, “kemi një shans të bëhemi të gjithë bashkë në 25 prill. Dhe unë të garantoj që ai proces që e nisëm ne, do ta çojmë deri në fund. Po të garantoj ty dhe gjithë familjet, që kanë ngecur 8 vite se ai nuk e mbajti premtimet për legalizimet falas, që ne do t’i përmbyllim e do t’i japim rrugë, sepse e kemi borxh ndaj jush në radhë të parë që e lamë në dorë të tij dhe e kemi borxh të dyfishtë për të korrigjuar edhe për të çuar në vend të gjitha ato dështimet e këtyre 8 viteve. Më 25 prill bëhemi të gjithë bashkë për ndryshim edhe fitojmë edhe legalizimet, edhe ekonominë, edhe me shpresën e Zotit jo vetëm mos të largohen më fëmijët e shqiptarëve, por të kenë mundësi edhe ata që janë larguar, t’u krijojmë kushte të kthehen këtu me paga dinjitoze”, tha Basha.