Ndalesa e radhës në rrugëtimin jug-veri të kreut të opozitës Lulzim Basha ishte qyteti i Kurbinit.
Në fjalën e tij para banorëve të Kurbinit, Basha tha se ndryshimi është çështje ditësh dhe 25 prilli është dita e kthimit të shpresës.
“Nga Saranda në Tropojë entuziazmi që prek dhe shoh ka një dhe një motiv frymëzimin shpresën besimin se ndryshimi tashmë ka ardhur. Se është i pandalshëm siç është ndryshimi ynë, ky bashkim gjigand zemrash në këtë shesh të Laçit, ky bashkim gjigand shqiptarësh ka dhe vetëm një motiv Shqipëria fiton duke votuar numrin 9”, tha Basha.
Në vijim, Basha tha se kjo forcë, kjo fuqi, ky entuziazëm dëgjojeni vëllezër dhe motra, ngrihuni dhe bashkohuni me ne, të gjithë bashkë për ndryshim.
“Më 25 Prill të gjithë bashkë do të votojmë numrin 9. Koalicioni për Ndryshim dhe Aleanca për Ndryshim janë qeveria e ardhshme e vendit. Këtë e di gjithkush, e di dhe e ka mësuar dhe Edi Rama që më 25 Prill shqiptarët do ta largojnë me votë. Për 8 vite dështime, për 8 vite mashtrime, për 8 vite premtime të pambajtura, për 8 vite vuajtje në çdo familje, në zemrat e çdo nëne e të çdo motre, për vëllezërit dhe bashkëshortët e larguar në emigracion apo të shpunësuar. Shikoni, shikoni se çfarë bën me rindërtimin. Shikoni se si edhe momentin më fatkeq të kurbinasve, të Thumanës, të Fushë-Krujës, të Durrësit, të Tiranës e përdor vetëm për interesat e tij personale, për pasurimin e tij dhe një grushti njerëzish, në kurriz të të gjithë njerëzve të tjerë”, u shpreh Basha.
Po ashtu, Basha u premtoi, se qeveria e re do të bëjë vlerësime transparente të dëmtimeve nga tërmeti.
“Sot, këtu, nga ky shesh, është vendi t’i them të gjithë të dëmtuarve nga tërmeti se detyra ndër më të parat e qeverisë së re dhe e imja si kryeministër i qeverisë së shqiptarëve, do të jetë vlerësimi dhe rivlerësimi me transparencë i dëmeve të shkaktuara për të hequr diskriminimin politik. Korrupsionin që ka pllakosur këtë proces e menjëherë pas saj kompensim financiar për shpejtimin e rindërtimit, për të gjithë familjet e dëmtuara nga tërmeti. Jo vetëm nuk do të ndalet, jo vetëm që nuk do të bllokohet. Por ky proces me një qeveri të përgjegjshme do të kishte përfunduar sot e nuk do ti kishte lenë dy dimra me radhë familjet e dëmtuara me çadra. Ky proces me qeverinë që ju do të sillni me votë me 25 prill do të përshpejtohet dhe do të përfundojë në kohën më të shkurtër”,- u shpreh Basha./ATSH/
