Ish kryetari i PD Lulzim Basha, i cili po synon rikthim në krye të një fraksioni të kësaj partie, ka deklaruar se “Për Shqipërinë sot është më imediate se kurrë pastrimi i politikës nga të gjithë ata që kanë shpërdoruar besimin e qytetarëve, duke i shërbyer interesave korruptive dhe klienteliste”.
Deklaratën e tij zoti Basha e bëri gjatë një takimi me përkrahësit e tij në Shkodër.
Ai ju referua çështjes së ish zëvendëskryeministrit Ahmetaj e cila është venë aktualisht në qendër të vemendjes. “Dosja e SPAK për arrestimin e Arben Ahmetaj, tregoi se si kjo qeveri miraton ligje e ndërmerr vendime vetëm për interesat kriminale të një klani” tha zoti Basha. “Drejtësia duhet të shkojë deri në fund, deri tek Edi Rama, njeriu që mban lidhjet e krimit dhe korrupsionit, sepse askush nuk mund të jetë mbi ligjin!” shtoi ai.
Ish kreu i PD tha se parlamenti duhet t’i hap rrugë pa humbur kohë vetting-ut dhe kontrollit të imtësishëm të pasurive dhe lidhjeve kriminale.
“Aleanca Qytetare për Demokracinë do të jetë koalicioni ynë për të pastruar politikën e për të mundësuar vetting-un e politikanëve, listat 100% të hapura, votën e diasporës, kufizimin e mandateteve, rritjen e mekanizmave të kontrollit të qeverisë nga Parlamenti” tha zoti Basha para përkrahësve të tij në Shkodër.
Ai premtoi se “Partia Demokratike do t’i nënshtrohet një procesi të thellë rinovimi dhe hapje ndaj profesionistëve dhe intelektualëve që ndajnë vlerat dhe vizionin tonë për një Shqipëri më të mirë.
Me demokratët që ishin në ballë të qëndresës anti-komuniste, me të persekutuarit dhe pronarët, me kontribuesit e pas vitit ’90, me burrat dhe gratë që sakrifikojnë prej dekadash, me të rinj e të reja nga brenda dhe jashtë vendit, Partia Demokratike do të formësojë alternativën që presin shqiptarët. Sot është koha e bashkimit të energjive, forcave, kapitaleve njerëzore e politike për t’i dhënë fund tranzicionit!” tha ish kryetari i PD Lulzim Basha, i cili po synon rikthim në krye të një fraksioni të kësaj partie në zgjedhjet që priten të zhvillohen në fund të korrikut.
