Kryetari i PD-së Lulzim Basha ka vizituar sot familjen e Flora Gjonit në Lezhë ku dhe deklaroi se pensionistët janë harruar dhe nuk marrin asnjë ndihmë.
Ai tha se pensionistët janë lënë krejtësisht në baltë nga qeveria e Edi Ramës. Në mes të pandemisë, sipas tij, ata nuk po marrin asnjë ndihmë ekonomike, ilaçet nuk po u rimbursohen.
“Pensioni i saj është krejt qesharak për të përballuar jetesën me të. Qeveria e Ramës ka dhënë ndihmën më të vogël në Ballkan për qytetarët e saj që nga fillimi i pandemisë. Kosto e jetesës në Shqipëri vazhdon të rritet. Çmimet e ushqimeve janë rritur me 6.6%. Çmimet e transportit janë rritur me 3.4%. Qytetarët shqiptarë meritojnë më shumë. Qytetarët e Shqipërisë meritojnë një qeveri që kujdeset për njerëzit, jo për vete”, shprehet Basha.
Po ashtu, Basha shton se “boll më! Shqiptarët nuk mund të durojnë një mandat të tretë të Edi Ramës. Qytetarët shqiptarë nuk duan dështime të tjera. Është koha për ta ndryshuar Shqipërinë dhe për të sjellë shpresë të re për shqiptarët”.
