Kryetari i PD, Lulzim Basha tha gjatë një takimi me të rinjtë e FRPD se do të zhvillojë një tur në të gjithë vendin për të diskutuar me të rinjtë. I pranishëm ishte edhe kryetari i Forumit Rinor të CDU-së gjermane, Tilman Kuban.
“Jam i nderuar për praninë e miqtë tanë nga Gjermania, kryetarit të forumit rinor të partisë tonë simotër, të partisë më të madhe politike në Europë, fuqisë më të madhe politike të PPE-ve, partisë së Kancelares Merkel, Kristian Demokratëve gjermanë, Tilman Kuban dhe delegacionin që e shoqëron, me deputetët dhe dy kryetarët e bashkive, të gjithë të Junge Union”, tha Basha.
A tha se, “në tërë dështimet e kësaj qeverie dhe të këtij kryeministri, dështimi më i madh është dështimi me rininë, e cila po rritet në një vend pa mundësi, pa punësim, pa perspektivë, me rroga të ulëta minimale, me kosto maksimale të jetës dhe të arsimimit”.
“Në një vend ku, për fat të keq, fjala e parë dhe kërkesa e parë e shumicës së rinisë, është të largohen nga vendi i tyre. Nuk ka pse të jetë kështu dhe nuk do të jetë kështu për shumë gjatë. Sepse ky vend e ka të gjithë potencialin për të krijuar mjaftueshëm, mirëqënie, punësim, mundësi për gjithë shqiptarët, në veçanti për rininë”, tha Basha.
Basha tha se lejet për protesta nuk merren te PD duke shtuar se “PD ju nxit të ngriheni në protestë dhe do jetë në krahun tuaj në çdo lëvizje dhe protestë që do të keni”
Ai shtoi se “sot kriza shqiptare është në Bundestag, në senatin amerikan, nuk ka njeri që ta heqë nga tavolina dhe ndjehuni krenarë për këtë”./ATSH/
