Lideri i demokratëve, Lulzim Basha ka zhvilluar këtë të hënë një takim me bizneset në rrugën Tiranë-Durrës, nga ku ka premtuar se kur opozita të vijë në pushtet nuk do të krijojë një ekip “kalçetoje” ashtu siç ka bërë kryeministri Rama.
Basha është shprehur se e gjithë ekonomia shqiptare është nën kontrollin e një grushti njerëzish të lidhur ngushtë me qeverinë, grup të çilin ai e ka cilësuar si ekip “kalçetoje”. Kreu i PD ka deklaruar se opozita i qëndron idesë së një takse të sheshtë 9% e cila do t’i sjellë frymëmarrje ekonomisë.
“Ne duhet të largojmë sistemin feudal ku sukses ka ai që njeh dikë. Kemi ekonomi të kontrolluar dhe gjithë pasuria kontrollohet nga një grup kalçeto. Nëse do të bësh punë dhe të ecësh para duhet të shkosh te kalçeto e Edi Ramës. Ne nuk kemi ndërmend të zëvëndësojmë kalçeton e Ramës me një kalçeto të Lulzim Bashës. Biznesi i vogël punëson 80% të popullsisë shqiptare. Nuk do të ketë kalceto të privatizuar. T’i japim fund ekonomisë së patronazhit. E kanë ndarë ekonomonë në dhjetë pjesë dhe kontrollohen nga 10 padronë”, tha Basha.
Basha ka folur po ashtu për taksën e transferimit të pronës duke kërkuar ndjesë dhe duke premtuar se me ardhjen e tyre në pushtet ajo do të ulet nga 15% në 3%.
“Gabim qe e nisem ne, se ne e cuam taksen e prones 8%, por keta e dyfishuan. Ne e nisem, por eshte koha edhe per te kerkuar ndjese. 3% do behet taksa e transferimit të pronës. 15 përqindëshi mbi pronën është taksa e akullit, ngrirjes së ekonomisë që nuk e lejon të ecë para”, e quajti Basha.
