Arijan Ademi ka fituar ndeshjen e mesfushorëve shqiptarë në Ligën e Evropës. Ademi luajti në qendër të mesfushës te Dinamo e Zagrebit që fitoi bindshëm, 3:0, ndaj Genkut në Belgjikë.
Në qendër të mesfushës te Genku startoi Bastien Toma.
Daniel Munoz i Genkut u përjashtua me të kuq në minutën e 65-të. Menjëherë në minutën e 70-të, Toma la vend për një lojtar tjetër në fushë. Ndërkohë Arijan Ademi luajti deri në minutën e 64-t për gjigantin kroat.
Bruno Petkoviq realizoi dy penallti për Dinamon, ndërsa një gol e shtoi Luka Ivanushec.
Dinamo ka shënuar fitoren e parë në fazën grupore të Ligës së Evropës. Në ndeshjen e parë kishte pësuar 2:0 nga West Hami.
Ndërkohë sulmuesi Albian Ajeti luajti nga minuta e 74-t për Celticun që pësoi 4:0 në shtëpi nga Bayer Leverkuseni.
