12 të arrestuar dhe 400 mijë euro janë sekuestruar në aksionin që ka realizuar Njësia Speciale e Policisë së Kosovës.
Operacioni ndodhi në Prishtinë, Istog, Gjilan, Podujevë dhe Lipjan, nën dyshimet për keqpërdorime të fondeve të subvencioneve. Operacionet zgjatën për disa orë.
Ndërsa, kryeprokurori i shtetit, Aleksandër Lumezi në një konfrencë për media bëri të ditur se aksionet do të vazhdojnë.
Lumezi tha se nga ky aksion janë arrestuar 12 persona dhe është konfiskuar një shumë e madhe parash, kompjuterë, telefona, vetura etj.
Ai tha se në muajin janar ka filluar grumbullimi i provave dhe informacioneve lidhur me këtë rast për ryshfet në subvencionet bujqësore, ndërsa arrestimi i 12 personave është bërë për keqpërdorim dhe shpërdorim detyre, marrje dhe dhënie ryshfeti.
Lumezi po ashtu tregoi se prej të arrestuarve, 10 janë zyrtarë dhe dy qytetarë.
Drejtori i Krimeve Ekonomike dhe Kundër Korrupsionit, Nazim Sahiti ka thënë se në këtë aksion sekuestruar diku afër 400 mijë euro. Ai tha se është bastisur Ministria e Bujqësisë ku në kuadër të saj është Agjencioni i Pavarur për Zhvillim të Bujqësisë si dhe disa zyra që funksionojnë në kuadër të AZHB-së në disa komuna.
“Sot gjatë ditës nga Drejtoria për Krime dhe Kundër-Korrupsion janë sekuestruar një shumë e madhe e parave, diku afër 400 mijë euro. Saktësisht ende nuk e dimë por sillen aty diku”, ka thënë ai.
Lidhur me rastin kanë reaguar edhe kryeministri në detyrë i Kosovës, Avdullah Hoti, i cili tha se pret një hetim të plotë për të gjithë që janë përfshirë në këtë rast.
“Pres hetim të plotë, gjithëpërfshirës dhe të shpejtë ndaj kujtdo që është i përfshirë në rastin e subvencioneve bujqësore. Fajtoret duhet të marrin dënimin maksimal. Këta njerëz nuk e meritojnë të jenë në institucione”, ka shkruar Hoti në Facebook.
