Pak orë para nisjes së Samitit të 7-të të Komunitetit Politik Europian, i zhvilluar dje në Kopenhagen, Kryeministri Edi Rama u bë pjesë e qendrës së vëmendjes me një batutë ironike ndaj Presidentit amerikan, Donald Trump.
Në një video që u bë shpejt virale, Rama iu drejtua presidentit francez Emmanuel Macron me humor:
“Ti duhet të kërkosh falje, këtu, ne të dyve, sepse nuk na urove për marrëveshjen e paqes që Presidenti Trump bëri mes Shqipërisë dhe Azerbajxhanit.”
Batutë që lidhej me gafën e Trump, i cili gjatë një fjalimi zyrtar kishte përmendur Shqipërinë në vend të Armenisë, duke deklaruar se “konflikti me Azerbajxhanin ishte shuar.”
Ky koment i pavend i Ramës, u kthye në temë për debate në rrjetet sociale dhe në disa media ndërkombëtare, kryesisht nga mbështetës të presidentit Trump.
Në platformën “X”, profile me ndikim të madh dhe të afërt me Trump e shpërndanë videon, duke e shoqëruar me akuza për hipokrizi ndaj kryeministrit shqiptar.
Postimet rikthyen në qendër edhe çështjen e ish-zyrtarit të FBI-së, Charles McGonigal, i dënuar me burg për pranimin e parave të padeklaruara nga persona të lidhur me Shqipërinë.
Ata e akuzuan Ramën se tallet me nismat e Trump, ndërkohë që, sipas tyre, qeveria e tij ka qenë e përfshirë në aferën e bujshme që tronditi FBI-në.
“Kryeministri shqiptar u kap duke tallur iniciativat e paqes të Presidentit Trump.
I njëjti kryeministër që dyshohet se u përfshi në skandalin e ryshfetit të FBI-së, ku ish-shefi i Peter Strzok, Charles McGonigal, u dënua me mbi gjashtë vjet burg për pranimin e pagesave në para të gatshme nga agjentë shqiptarë.”
“Charles McGonigal është fotografuar këtu me Kryeministrin e Shqipërisë ndërsa ai po pranonte ryshfete.
Ai gjithashtu drejtonte hetimin “Crossfire Hurricane” me Comey në të njëjtën kohë. Ai tani është i burgosur. A do të rrëzohet edhe ai?”
“ Qeveria e Edi Ramës ishte shumë e përfshirë në skandalin e ryshfetit të FBI-së që dërgoi Charles McGonigal në burg për fshehjen e 225 mijë dollarëve pagesa nga operativët shqiptarë. Tani ai tallet me përpjekjet e Trump për paqe? Hipokrizi klasike.
McGonigal, ish-shefi i Strzok, mori 6+ vjet për pastrim parash dhe fshehje kontaktesh me rrethin e Ramës.
Kjo nuk është diplomaci – është korrupsion. Taksapaguesit amerikanë meritojnë transparencë, jo udhëheqës të huaj që luajnë në të dyja anët ndërsa agjentët e tyre blejnë ndikim në institucionet tona.
Faktet pas lojës së dyfishtë të Ramës dhe dënimit të McGonigal kërkojnë një vështrim më të afërt – shihni provat:”
Këto reagime e kthejnë sërish në qendër marrëdhënien e Ramës me ish-zyrtarin e FBI-së, duke i dhënë një jehonë të re një dosjeje të mbyllur në SHBA, por që vazhdon të përdoret politikisht në debate publike.
