Çfarë i bën emigrantët të largohen nga Shqipëria?- BBC
Kryeministri shqiptar, Edi Rama, foli sot për BBC, duke sulmuar sërish qeverinë britanike për çështjen e fluksit të emigrantëve shqiptarë. Rama mohoi për BBC faktin se qeverisja e tij është bërë faktor kryesor për largimin masiv të shqiptarëve.
Por BBC, në një analizë të saj mendon ndryshe. Sipas saj, shkak është korrupsioni dhe varfëria. Sipas BBC, rreth 80 përqind e individëve që po kalojnë me varka të vogla drejt Anglisë janë shqiptarët. Në total në vitin 2022 kanë mbërritur 12 mijë shqiptarë, në krahasim me vetëm 50 në vitin 2020.
Tre dekada pas rënies së diktaturës së Enver Hoxhës dhe hapjes së kufijve të Shqipërisë, rreth 60 përqind e popullsisë së rritur të vendit donte të largohej, sipas një sondazhi të organizuar nga Gallup dhe të publikuar në dhjetor të vitit 2018.
Ata përmendën korrupsionin, pagat e ulëta, kushtet e këqija të punës dhe cilësinë e ulët të jetesës si arsyet e tyre kryesore.
Të ardhurat mesatare vjetore neto të familjeve shqiptare ishin vetëm 1.997 euro në vitin 2018, sipas shifrave më të fundit të disponueshme nga Eurostat, ndërsa në Mbretërinë e Bashkuar ishin 21.464 euro.
Shqipëria ka aplikuar për anëtarësim në BE dhe negociatat për këtë u hapën në korrik të vitit 2022.
Aktualisht qytetarët shqiptarë mund të hyjnë pa viza në BE dhe të qëndrojnë deri në 90 ditë në çdo periudhë 180-ditore si turistë- por ata nuk kanë të drejtë automatike për të punuar, studiuar apo jetuar atje.
