Me dozat shtesë, vendet anëtare të BE-së do të marrin mbi 200 milionë doza të vaksinës kundër COVID-19 në tremujorin e dytë të vitit 2021
Komisioni Evropian (KE) theksoi se ka arritur marrëveshje me BioNTech-Pfizer për të marrë 10 milionë doza shtesë të vaksinës kundër koronavirusit të ri (COVID-19), raporton Aandolu Agency (AA).
Me dozat shtesë, vendet anëtare të BE-së do të marrin mbi 200 milionë doza të vaksinës në tremujorin e dytë të vitit 2021.
“Këto doza do të tërhiqen nga opsioni i 100 milionë dozave në kontratën e dytë me BioNTech-Pfizer, të parashikuar për tremujorin e tretë dhe të katërt të vitit 2021”, tha Komisioni në një njoftim.
Presidentja e Komisionit Evropian, Ursula von der Leyen, tha se dozat shtesë “u jep hapësirë shteteve anëtare për të manovruar dhe ndoshta për të mbushur boshllëqet në dërgesa”.
“E di se sa kritike është tremujori i dytë për hapjen e strategjive tona të vaksinimit në shtetet anëtare. Këto 10 milionë doza të përshpejtuara do të sjellin dozat totale të BioNTech-Pfizer në tremujorin e dytë deri në mbi 200 milionë”, tha ajo.
Bashkimi Evropian ka një marrëveshje prej 600 milionë dozave me BioNTech-Pfizer, duke përfshirë opsionet.
BE-ja deri më tani ka aprovuar përdorimin e vaksinave BioNTech-Pfizer, Moderna, AstraZeneca dhe së fundmi Johnson & Johnson.
Nga ana tjetër, procesi paraprak i vlerësimit të vaksinave të zhvilluara nga Novavax, Curevac dhe vaksina Sputnik V e Rusisë vazhdon.
