Bashkimi Evropian ka paralajmëruar sanksione ndaj presidentit të kontestuar të Bjellorusisë, Alexander Lukashenko, nëse nuk fillon dialogun me opozitën dhe nuk pushon së përdoruri dhunën ndaj protestuesve.
“BE-ja u bën thirrje autoriteteve bjelloruse të kërkojnë një zgjidhje paqësore dhe demokratike të krizës përmes një dialogu më të gjerë kombëtar dhe mbështet planin e Organizatës për Sigurinë dhe Bashkëpunimin në Evropë për të ndërmjetësuar dialogun”, tha Këshilli i Ministrave të Jashtëm të Bashkimit pas një takimi të mbajtur sot në Luksemburg.
Në fillim të këtij muaji, udhëheqësit e BE-së vendosën sanksione ndaj 40 zyrtarëve bjellorusë, të cilët BE-ja i konsideron përgjegjës për dhunën kundër protestuesve paqësorë, zyrtarëve të opozitës e gazetarëve dhe për sjelljen e keqe gjatë zgjedhjeve presidenciale të këtij viti.
Sipas rezultateve zyrtare, Lukashenko fitoi zgjedhjet më 9 gusht bindshëm dhe fitoi mandatin e gjashtë, por opozita beson se zgjedhjet u manipuluan. Rezultatet e zgjedhjeve nuk i kanë njohur as BE-ja dhe SHBA-ja.
Ministrat e BE-së përsëritën se zgjedhjet presidenciale në Bjellorusi nuk ishin as të lira as të drejta, dhe se Lukashenko, një aleat i presidentit të Rusisë, Vladimir Putin, nuk ka asnjë legjitimitet demokratik dhe ata mbështetën thirrjet për përsëritjen e zgjedhjeve.
Dhjetëra-mijëra njerëz protestuan në Minsk të dielën, javën e dhjetë me radhë, duke kërkuar dorëheqjen e Lukashenkos, i cili ka drejtuar vendin me një dorë “të hekurt” për 26 vjet.
Sipas vlerësimeve të grupit të të drejtave të njeriut “Vesna”, ishin 100.000 njerëz në protestë, të cilët policia u përpoq t’i shpërndajë me topa uji dhe shkopinj, duke plagosur dhjetëra prej tyre.
